«Ordabasy» fýtbol klýbynyń 4,2 mlrd teńge qaryzy qalalyq bıýdjet esebinen jabyldy
ShYMKENT. KAZINFORM - «Ordabasy» fýtbol klýby Eýrokýbok oıyndaryna qaryzsyz qatysady. Bul týraly Shymkent qalasy ákimdiginiń baspasóz qyzmeti málimdedi.
Shymkent qalasynyń ákimi Ǵabıt Syzdyqbekov «Ordabasy» fýtbol komandasynyń jankúıerlerimen kezdesip, fýtboldy damytýdaǵy josparlarymen bólisti.
Ótken jyly komanda 32 jyldyq tarıhynda alǵash ret el chempıonatynda úzdik dep tanyldy. Degenmen, klýbtyń jyldar boıy qordalanǵan qaryzy 4,2 mlrd teńgege jetken bolatyn. Kúrdeli másele qala ákiminiń tapsyrmasyna sáıkes sheshimin tapty. Qazirgi tańda klýb bereshegi tolyqtaı jabyldy. Komandanyń UEFA Chempıondar Lıgasyna qatysatyny eskerilip, jergilikti bıýdjet esebinen bıylǵy jylǵa 4,3 mlrd teńge qarjy bólindi. Nátıjesinde «Ordabasy» klýby Eýrokýbok oıyndaryna qaryzsyz qatysatyn bolady.
Qala ákimdigi óz tarapynan ózekti máselelerdiń barlyǵyn sheship, mindettemelerin tolyqtaı oryndady. Endigi jerde qarajattyń tıimdi jumsalyp, komandanyń nátıjeli oıyn kórsetýine tikeleı klýb prezıdenti B.Abdýbaıtov jaýapty.
«Jýyrda Memleket basshysyna qalanyń 2023 jylǵy áleýmettik-ekonomıkalyq damýy jóninde esep berýim barysynda megapolıske zamanaýı standartqa saı stadıon qajettiligin baıandaǵan bolatynmyn. Prezıdentimiz bıyl jańa stadıonnyń qurylysyn bastaý týraly naqty tapsyrma berdi. Bıyl «Bozaryq» eldimekeninde 35 myń orynǵa eseptelgen stadıon qurylysyn bastap, 2 jylda, aıaqtaımyz dep josparlap otyrmyz. «Qajymuqan» stadıony týraly da kópshiliktiń arasynda ártúrli alyp-qashpa aqparattar taralýda. Onyń bári negizsiz. Bul stadıondy da rekonstrýktsııadan ótkizip, komandanyń qosalqy alańyna jáne jeńil atletıkadan ulttyq komanda jattyǵatyn orynǵa aınaldyratyn bolamyz», - dedi Ǵ.Syzdyqbekov.
Odan bólek, qala ákimi fýtbol klýbyn qoldaý máselesine qatysty kásipkerlermen arnaıy kezdeskenin, jıyn qorytyndysy boıynsha «OTAU GROUP» qurylys kompanııasynyń komandaǵa 1 mlrd teńge kóleminde qarjy bólip, Bas demeýshi bolýǵa nıet bildirgenin jetkizdi.
Jıyn barysynda jankúıerler tarapynan komanda quramyn ózgertýge qatysty suraq qoıylǵan bolatyn. Klýb prezıdenti B.Abdýbaıtov 2023 jyldyń basynda oıynshylarmen 2 jyl merzimge kelisimshart jasalǵanyn, onyń buzylmaıtynyn jáne 2025 jylǵa deıin komanda quramynyń ózgermeıtinin málimdedi.
