«Ordabasy» fýtbol klýby jeke basqarýǵa ótken komandalar qataryna qosylady
ASTANA. KAZINFORM – Shymkenttik «Ordabasy» fýtbol klýby jeke basqarýǵa ótedi. Bul jóninde qala ákimdiginiń baspasóz qyzmeti málim etti.
Búgin «Ordabasy» kásibı fýtbol klýbyn jekeshelendirý týraly memorandýmǵa qol qoıyldy. Oǵan qala ákimi Ǵabıt Syzdyqbekov pen «Integra Construction KZ» JShS basshylyǵy qatysty.
Memorandým Memleket basshysy Qasym-Jomart Toqaevtyń kásibı fýtbol klýbtaryn jekeshelendirý jáne kommertsııalandyrý jónindegi tapsyrmasy aıasynda júzege asyryldy.
Qujat jeke ınvestıtsııalar jumyldyrýdy, turaqty naryqtyq basqarý modeline kóshýdi jáne zamanaýı korporatıvtik basqarý standarttaryn engizýdi kózdeıdi. Negizgi baǵyttardyń qatarynda materıaldyq-tehnıkalyq bazany jańartý, jattyǵý ınfraqurylymyn damytý, basqarý úderisterin tsıfrlandyrý jáne klýbtyń kommertsııalyq tıimdiligin arttyrý bar.
Qala ákimi Ǵabıt Syzdyqbekov kásibı sportqa jeke ınvestıtsııa tartý fýtbol ınfraqurylymyn damytýǵa, jas oıynshylardy daıarlaýǵa jáne qalanyń eldegi fýtbol ortalyqtarynyń biri retindegi pozıtsııasyn nyǵaıtýǵa jańa múmkindikter ashatynyn atap ótti.
Óz kezeginde seriktestik basshysy Shahmurat Mútálip kompanııanyń klýbty damytýdy uzaq merzimdi ári áleýmettik mańyzy bar joba retinde qarastyrylatynyn aıtty.
– «Ordabasy» – tarıhy baı ári jankúıerleri myqty qoldaý kórsetetin klýb. Bizdiń aldymyzda ınfraqurylymǵa, jas oıynshylardy daıarlaýǵa jáne básekege qabiletti komanda qalyptastyrýǵa basa mán bere otyryp, klýbtyń turaqty damýyn qamtamasyz etý mindeti tur, - dedi ol.
Eske salsaq, budan buryn elimizde «Qaısar», «Jeńis», «Shahter», «Qyzyljar», «Aqtóbe» klýbtary jekemenshikke ótti.