Ánshi Dastan Orazbekov Italııada ótken jarysta top jarǵan alǵashqy qazaqstandyq ártis atandy

ASTANA.KAZINFORM - «Orda» tobynyń solısi Dastan Orazbekov Italııada ótken tolyq Ironman jarysyn eńsergen alǵashqy qazaqstandyq ártis atandy.

Bıyl 20 tamyzda Italııanyń Chervııa qalasynda «Orda» tobynyń solısi Dastan Orazbekov álemdegi eń kúrdeli jarystardyń biri sanalatyn tolyq Ironman qashyqtyǵyn sátti aıaqtady.

Osylaısha ol bul synaqty eńsergen alǵashqy qazaqstandyq óner ıesi boldy. Ironman jarysy 3,8 km júzý, 180 km velosıped jáne 42,2 km marafonnan turady. Bul synaq Ánshiniń resmı ókiliniń málimetinshe, Dastan úshin tek sporttyq jetistik emes, ózine qoıǵan úlken maqsat pen rýhanı jeńis boldy.

Ánshiniń aıtýynsha, ómirge, iske jáne jaqyndaryna degen mahabbat adamǵa kez kelgen qashyqtyqty baǵyndyrýǵa kúsh beredi.

Dastan Orazbekovtiń bul jetistigi — tabandylyq pen rýhtyń sımvoly. Ol qazaqstandyq jastarǵa sportpen aınalysýǵa jáne densaýlyqty nyǵaıtýǵa shabyt beretin jarqyn úlgi boldy.

Aıta keteıik, Astanada halyqaralyq Silk Way Star vokaldyq baıqaýy jalǵasyp jatyr. Úshinshi epızod artta qalyp, jobadan taǵy bir qatysýshy shyǵyp, jarys odan ári qyza tústi.