ORDA FM Tóreǵalıdiń barlyq ánderin efırden alyp tastady

ASTANA. QazAqparat- ORDA FM radıostantsııasynyń dırektory Azamat Isaev halyq aldynda dóreki minez kórsetken ánshi Tóreǵalı Tóreáliniń barlyq ánderi efırden alynyp tastalǵanyn málim etti. 

Bul týraly ol Instagramdaǵy paraqshasynda habarlady.
 

«ORDA FM jetekshisi retinde jelide taraǵan ánshi Tóreǵalı Tóreáliniń sahnada kórsetken «ónerinen» soń ánshiniń barlyq ánderiniń efırden alynyp tastalǵanyn habarlaımyn. Sahnadaǵy óreskel qylyǵy úshin kontsertke kelgen kórermenderden keshirim suraýyn talap etemiz!» delingen habarlamada.

Aıta keteıik, buǵan deıin áleýmettik jelilerde Tóreǵalı Tóreáliniń sahnada turyp kontsertke kelgen qarııamen sózge kelip qalǵany beınelengen vıdeo tarap ketken bolatyn. Halyqtyń pikirlerine qaraǵanda, kontsertte úlken kisilerdiń bireýi Tóreǵalı Tórálige "fotoǵa túse bermeı, ánińdi aıtpaısyń ba?" degen syńaıda eskertý jasaǵan.Ony myna vıdeodan anyq baıqaýǵa bolady.

Sodan ashýǵa mingen ánshi kontsertke kelgen barsha kórermenderine kókeıinde júrgen oıyn jetkizgen.

Osydan oqıǵadan soń ánshi Instagramdaǵy paraqshasynda «ótirik» degen sóz jazylǵan kartına jarııalady. Buny Tóreǵalıdyń jaýaby dep túsinip jatqandar da bar. Alaıda ORDA FM jetekshisi bul árekettiń jalǵan ekenine senbeıtinin de bildirgen.

«Esti ánderdiń oryndaýshysy, xalyq aldynda saxna tórinde essiz qylyq kórsetip jatsa, onymen qoımaı "bul jalǵan" dep xalyqty aldasa, onda biz de ondaı óner ıesiniń ánderin nasıxattaýdan bas tartamyz. Bul - ujymdyq sheshim. Essiz áreketke toqtaý bolý kerek!» - dep jazdy ol Instagramda.