Orda Aımaq. El óńirlerinde jańa ıpotekalyq baǵdarlama iske qosylady

ASTANA. KAZINFORM — Elimizde aımaqtarǵa arnalǵan jańa «Orda Aımaq» ıpotekalyq baǵdarlamasy 7 sáýirde bastalady, dep habarlaıdy «Qazaqstan Turǵyn úı Kompanııasy» AQ.

Kompanııa taratqan aqparatqa sáıkes «Orda Aımaq» ıpotekalyq nesıelendirýdiń jańa baǵdarlamasy 2025 jyldyń 7 sáýirinen bastap iske qosylady dep josparlanǵan.

— Jańa ıpotekalyq baǵdarlama QTK kepildigimen qurylysqa úlestik qatysý týraly shart boıynsha salynyp jatqan turǵyn úıdi satyp alýǵa múmkindik beredi. Bul QTK kepildigimen úleskerdiń ınvestıtsııalary qorǵalatynyn bildiredi: qurylys aıaqtalmaǵan nemese qurylys salýshy bankrot bolǵan jaǵdaıda, QTK úı qurylysynyń aıaqtalýyna kepildik beredi. Ótinimder «Otbasy banki» AQ ýákiletti agentteri arqyly qabyldanady. 21 jastan asqan Qazaqstannyń kez kelgen azamaty qaryz alýshy bola alady. «Otbasy Bank» AQ-da depozıttiń bolýy boıynsha qaryz alýshyǵa qoıylatyn talaby men turǵyn úıdiń bolýy boıynsha shekteý «Orda Aımaq» baǵdarlamasyna qoldanylmaıdy, — delingen habarlamada.

Baǵdarlamanyń negizgi artyqshylyqtary:

• 15,9% mólsherinde belgilengen syıaqy mólsherlemesi, JTSM 17,26% — dan 22,81% — ǵa deıin.

Ikemdi sharttar:

• • bastapqy jarna: 20% bastap.
  • qaryz somasy: 1 mln teńgeden 75 mln teńgege deıin.
  • qaryz merzimi: 12 aıdan 240 aıǵa deıin.
• Turǵyn úıdiń bastapqy quny tómen: salynyp jatqan turǵyn úıdiń baǵasy daıyn turǵyn úıge qaraǵanda tómen.

— Salynyp jatqan qurylys obektileriniń sıpattamasymen, sondaı-aq satý bólimsheleri men konsýltanttardyń baılanystarymen QTK turǵyn úı portalynda orda.homeportal.kz tanysýǵa bolady. Tolyq aqparat alý úshin QTK-nyń sall-ortalyǵyna habarlasyńyz: [phone] — qalalyq telefon, 8 800 080-44-48 — uıaly telefon, — dep atap ótti «Qazaqstan Turǵyn úı Kompanııasy» AQ baspasóz qyzmeti.

Budan buryn «Shyǵys mamany» ıpotekalyq baǵdarlamasy engizilgeni málim boldy.