Orbulaq shaıqasynyń 375 jyldyǵyna oraı «Uly jebe» memorıaldy kesheni ashyldy
JARKENT. QazAqparat - Búgin Jarkent qalasynda Tuńǵysh Prezıdent kúnine oraı jáne Orbulaq shaıqasynyń 375 jyldyǵyna baılanysty «Uly jebe» memorıaldy kesheni ashyldy. Saltanatty sharaǵa oblys ákimi Amandyq Batalov, Parlament Májilisiniń depýtaty, qoǵam qaıratkeri Qýanysh Sultanov, tarıhshy ǵalymdar, qalamgerler, aýdan jurtshylyǵy qatysty, dep habarlaıdy QazAqparat tilshisi.
«Uly jebe» memorıaldyq kesheni negizinen aq mármár men granıtten daıyndaldy. Jobanyń quny - 278,6 mln teńge. Qurylysyn júrgizgen merdiger uıym - «Kagan Engineering» JShS. Memorıaldy keshenniń sýretshileri - Ǵazız Eshkenov pen Aıdar Jamhan, músinshi arhıtektory - Aıdyn Jaılaýbaev. Memorıaldy keshendi tulparly batyrlar beınelengen barelef, joǵaryǵa tik shanshylǵan jebe men qalqan qurap tur.
«Orbulaq shaıqasy - qazaq halqynyń azattyq jolyndaǵy tarıhı oqıǵalarynyń biri. Elbasymyz Nursultan Ábishuly Nazarbaev «Orbulaq pen Ańyraqaıdaǵy tarıhı mańyzdy jeńister Azattyqtyń aq týy astynda jelbiredi» dep tarıh tolqynyndaǵy erlikke toly uly oqıǵalardy dáripteýge erekshe mán bergen bolatyn. Memleket basshysynyń jaqynda jaryq kórgen «Uly Dalanyń jeti qyry» atty maqalasy da ulttyq tarıhymyzǵa tereń úńilýge, halqymyzdyń ótkenine, búgini men bolashaǵyna zor qurmetpen qaraýǵa úndeıdi. Orbulaq shaıqasy - sol Uly Dala tarıhynyń bir paraǵy», - dedi A. Batalov.
Oblys basshysy óz sózinde keshenniń avtorlary - Ǵazız Eshkenov, Aıdar Jamhan jáne Aıdyn Jaılaýbaevqa kópshiliktiń atynan alǵys aıta otyryp, Qurmet gramotasy men Alǵys hattaryn tabystady.
Munan soń Parlament Májilisiniń depýtaty Qýanysh Sultanov, jazýshy, Memlekettik syılyqtyń laýreaty, «Alash» ádebı syılyǵynyń ıegeri Beksultan Nurjekeev, jastar atynan Ernar Erǵalı sóz alyp, tarıhı oqıǵanyń mańyzy, onyń búgingi kúnge berer tálim-tárbıesi týraly sóz qozǵady.
Memorıaldy keshenniń shymyldyǵy ashylyp, shashý shashyldy, jıyn án-jyrmen órnekteldi.
Orbulaq shaıqasynyń 375 jyldyǵyna arnalǵan shara aýdandyq Mádenıet úıinde ǵylymı-praktıkalyq konferentsııamen jalǵasty. Onda Talas Omarbekov, Bereket Káribaev, Nábıjan Muhamethanuly syndy tarıhshy ǵalymdar baıandama jasap, shaıqastaǵy áskerı ádis-tásilder, oǵan qatysqan batyrlar týraly tarıhı derekterdi molynan sóıletti.
