«Orbıt» saǵyzyn urlaǵan Aqtaý turǵynynyń isi medıatsııamen aıaqtaldy
AQTAÝ. QazAqparat - Aqtaý qalalyq sotynyń qaýlysymen Sh.-ǵa qatysty qylmystyq is medıatsııa rásimimen aıaqtaldy, dep habarlaıdy QazAqparat vedomstvonyń baspasóz qyzmetine silteme jasap.
Sotta anyqtalǵandaı, Aqtaý qalasynyń turǵyny Sh. «Dana» sýpermarketinen «Orbıt» saǵyzy salynǵan 3 qorapshany urlap ketken. Ár qorapshada 10 danadan, barlyǵy 30 saǵyz bolǵan. Osylaısha ol jábirlenýshige 13 500 teńge shyǵyn keltirgen.
Іsti qaraý barysynda taraptar bir-birimen ymyraǵa kelip, tatýlasýyna baılanysty, qylmystyq is medıatsııa tártibimen qysqartyldy. Sottalǵan Sh. jábirlenýshige keltirgen shyǵyn kólemin qaıtardy, al, jábirlenýshi oǵan keshirim berdi.
Sot qaýlysy zańdy kúshine engen joq.
