Orban Ýkraına boıynsha EO-nyń 27 eli qabyldamaq bolǵan deklaratsııany buǵattady

ASTANA. KAZINFORM — Vengrııa premer-mınıstri Vıktor Orban Ýkraına boıynsha EO-nyń 27 eli basshylarynyń birlesken deklaratsııasyn qabyldaýǵa taǵy da kedergi keltirdi. Bul týraly Orban 20 naýryz, beısenbi kúni H áleýmettik jelisinde jazba qaldyrdy, dep habarlaıdy Dw.com.

— Veto! Jetedi! Biz Ýkraınasynyń EO-ǵa músheligi týraly majar halqynan suraımyz. Sol ýaqytqa deıin bul máselege qatysty qandaı da bir ortaq ustanymdy qoldaı almaımyz, — dep jazdy Vengrııa premer-mınıstri.

❌ Veto! Enough is enough! We will ask the Hungarian people about the EU-membership of Ukraine. We cannot support any common position on this matter until then. pic.twitter.com/Mvlf7jKrI9

— Orbán Viktor (@PM_ViktorOrban) March 20, 2025

Deklaratsııany 26 el qabyldady

Eýroodaq elderiniń 26 memleketiniń basshylary jarııalaǵan deklaratsııada Kıevke qoldaý bildirý aıtyldy, dep habarlaıdy AFP agenttigi. Qujatta Ýkraınaǵa shuǵyl áskerı jáne qorǵanys qajettilikterin qanaǵattandyrý úshin kúsh-jigerdi jedeldetý qajettigi atap ótilgen.

Sondaı-aq, EO-nyń syrtqy ister jáne qaýipsizdik saıasaty jónindegi joǵarǵy ókili Kaııa Kallastyń Ýkraınaǵa bıyl 5 mlrd eýro kóleminde artıllerııalyq oq-dáriler bólý bastamasy týraly aıtyldy. Deklaratsııada Eýroodaqtyń Ýkraınanyń EO-ǵa múshelikke ótý jolyndaǵy reformalaryn qoldaýdy jalǵastyratyny erekshe atap kórsetildi.

Ýkraınaǵa áskerı kómek paketi

Buǵan deıin Vıktor Orban Ýkraınaǵa qatysty EO sheshimderin birneshe ret buǵattaǵan nemese keshiktirgen bolatyn.

4 naýryzda Politico basylymy Vengrııa bıliginiń Ýkraınaǵa 20 mlrd eýro kóleminde áskerı kómek kórsetý týraly Eýroodaq sheshimin qabyldaýǵa kedergi keltirgenin habarlady.

Bul kómek paketi týraly alǵashqy málimet 21 aqpanda Politico-da jarııalanyp, EO dıplomattary Vengrııanyń qarsylyǵyna baılanysty bul qarajat barlyq odaq atynan emes, jeke memleketter arqyly bólinýi múmkin ekenin aıtqan edi.

Buǵan deıin Vıktor Orban EO basshylyǵyna birqatar talaptar qoıǵan bolatyn.