Orazkúl Asanǵazy: Habarlandyrýdy qazaqsha jazbaıtyndar zańdy buzyp otyr

ASTANA. QazAqparat  - Búgin Lev Gýmılev atyndaǵy Eýrazııa ulttyq ýnıversıtetinde ótken jıynda memleket jáne qoǵam qaıratkeri Orazkúl Asanǵazy stýdent-jastarǵa rýhanı jańǵyrýdyń mán-mańyzyn túsindirip berdi, dep habarlaıdy QazAqparat tilshisi.

"Jastardyń kópshiligi kópqabatty úıde turady. Ondaı úılerdiń bárinde lıft bar. Sol lıftilerde, kem degende, 30-50 xabarlandyrýdy iledi. Jartysynda qazaq tili joq. Al sol úıde turatynyń 98 paıyzy - qazaq, biraq namysy joq, óziniń elin súımeıtin, tilin súımeıtin beımaral, beıqam qazaq. "Til týraly" zańnyń 19-21 baby boıynsha xabarlandyrý aldymen qazaqsha, sosyn oryssha jazylýy kerek. Qaıda qazaqshasy?! Eki ret qońyraý shalyp, eskertý jasaýǵa bolady! Úshinshi ret sotqa ber! Sol sotta jeńesiń", - deıdi Asanǵazy.

Osy oraıda ol qala meıramxanalarynyń qazaqshasyn da synǵa aldy. Sebebi as máziri de qazaq tilinde jazylmaıdy. "Qashanǵa júre beremiz?! Tselınograd kezinde on adamnyń ekeýi qazaq boldy. Dál búgingi Astanada on adamnyń jeteýi - qazaq. Mektep jasyndaǵy on balanyń segizi - qazaq.  Elbasy óz maqalasynda osy máseleni kóterip otyr", - dep atap kórsetti Orazkúl Asanǵazy. Onyń aıtýynsha, rýhanı jańǵyrý úshin de eń bastysy, qazaq tilinde, memlekettik tilde sóıleıtin azamattar kóp bolýy shart.

Aıta keteıik , dál osy jıynda jazýshy Aldan Smaıyl burynǵy Aqmola  qalasynda qazaq tilin damytý jumysy qalaı bastalǵanyn áńgimelep bergen edi.