Orazbek Bekbas: Bolashaq – atom elektr stansalarynda

ASTANA. KAZINFORM – «Qazaqstannyń salalyq energetıkter kásipodaǵy» QB tóraǵasy Orazbek Bekbas atom elektr stansasyn salýǵa qatysty pikir bildirdi.

«Atom elektr stansasyn salýdan qorqatyn eshteńe joq. Qazaqta «qoryqqanǵa qos kórinedi» degen sóz tirkesi bar. Radıatsııa bar. Degenmen álemde 360 MVt-tyq birinshi AES 1966 jyly Shvetsarııanyń Vıtsnaý qalasynda salyndy. Sodan beri 52 memlekette AES bar, 400-den astam reaktor jumys istep tur. Ár memlekette radıoaktıvti qaldyqtardy kómetin orny bar. Tipti, Qazaqstannyń ózinde radıoaktıvti qaldyqtardy saqtaıtyn qoıma Úlbi metallýrgııalyq kombınatynda, Aqtaýdaǵy Qoshqaratada, Stepnogorskide bar. Sondyqtan odan qorqýdyń qajeti joq. Árıne, apat bolsa óte qaýipti ekeni ras. Aqyldy adam ózgeniń qatelerine qarap, óz qatesin túzeıdi. Sondyqtan aldyǵy qatarly prıntsıptermen salynǵan stansııalardy qarastyrýymyz qajet. Bolashaq – atom elektr stansalarynda», - dedi ol.

Onyń atap ótýinshe, AES salýmen eldiń energetıkalyq qaýipsizdigi qamtamasyz etilmeıdi. Sondyqtan Jylý elektr ortalyqtary, jańaratyn energııa kózderi salynady. Jalpy JEO men AES-tiń paıdaly áser koefıtsentinde alshaqtyq bar. Máselen, JEO-nyń paıdaly áser koefıtsıenti kómirdiń sapasyna baılanysty 40 paıyzǵa ǵana jetse, AES-tiń paıdaly áser koefıtsıenti 70 paıyzdan asady.