Orazaly Sábdenniń «Ekonomıka» atty 10 tomdyq tańdaýly eńbekteriniń tanystyrylymy boldy
ASTANA. Aqpannyń 19-y. QazAqparat - Búgin Astanadaǵy Ulttyq Akademııalyq kitaphanada Qoǵamdyq Palata músheleriniń jáne Parlament Senaty men Májilisi depýtattarynyń, ekonomıka salasyn zerttep júrgen ǵalymdardyń qatysýymen qarjy-ekonomıkalyq reforma jáne aımaqtyq damý sektsııasynyń jetekshisi, ekonomıka ǵylymdarynyń doktory, Qoǵamdyq Palatanyń múshesi Orazaly Sábdenniń «Ekonomıka» atty 10 tomdyq tańdaýly eńbekteriniń tanystyrylymy boldy,
dep habarlaıdy QazAqparat.
QR Parlamenti Májilisi Tóraǵasynyń orynbasary, Qoǵamdyq Palatanyń tóraǵasy Sergeı Dıachenko kirispe sóz sóılep, eldiń damýy, ekonomıkalyq jańa izdenister jaıly tanymal ǵalymnyń jaryqqa shyǵyp otyrǵan eńbegi jóninde aıtyp ótti.
Kelesi kezekte kitap avtory Orazaly Sábden on tomdyqtyń árqaısysyna jeke-jeke sholý jasady.
On tomdyqtyń basty ereksheligi - memlekettik jáne orys tilinde qatar shyǵyp otyrǵandyǵy. Ekonomıka taqyrybynda memlekettik tildegi ǵylymı eńbekterdi, oqýlyqtardy tabý oqý oryndarynyń ustazdary men stýdentterge úlken qıyndyqtar týdyryp kele jatqany jasyryn emes. O. Sábdenniń bul on tomdyǵy atalǵan taqyrypty zerttep júrgen jandar úshin asa qajet ekeni belgili.
Aıta ketý kerek, birinshi tom «Innovatsııalyq ekonomıka» dep atalady. Bul tomda el ekonomıkasyn jańasha qurý ıdeıalary qamtylǵan. Ár kitaptyń ataýy birizdilikpen jalǵasyn taýyp otyrǵan. Ekinshi tom «Básekelestikke qabiletti ekonomıka», úshinshi tom «Qazaqstannyń áleýmettik-ekonomıkalyq damýynyń ózekti máseleleri» degen taqyryptardy qamtıdy. Odan ári kelesi tomdar «Naryqtyq ekonomıka» (oqý quraly) (4-tom), «Qazaqstan ekonomıkasyn qalpyna keltirý úshin ne isteý qajet?» (5-tom), «Halyq ıgiligi úshin» (6-tom), «Qazaqstannyń ónerkásiptik kásiporyndaryn qarjy-nesıelik retteý: máseleler men bolashaǵy» (7-tom), «Shaǵyn kásipkerlik» (8-tom) dep atalǵan. Al toǵyzynshy tom «HHІ ǵasyrdyń qarsańyndaǵy aýyspaly kezeńniń ekonomıkalyq saıasaty», onynshy tom «Ǵylym. Bilim berý. Naryqtyq ekonomıka» degen ataýmen jaryq kórip otyr.
Jańa ǵylymı eńbek týraly Qoǵamdyq Palatanyń múshesi, ekologııa, aýyl sharýashylyǵy jónindegi sektsııanyń jetekshisi Mels Eleýsizov, akademık Ǵanı Qalıev, ekonomıka ǵylymdarynyń doktory Myrzakeldi Kemel, Qazaqstan Respýblıkasynyń Prezıdenti janyndaǵy raqymshylyq jasaý máseleleri jónindegi komıssııanyń tóraıymy Zınaıda Fedotova jáne basqa ǵalymdar men áriptesteri memleketimizdiń damýyna úles qosatyn on tomdyq jınaq mamandar men ǵalymdar, joǵarǵy oqý oryndarynyń ustazdary men stýdentteri úshin asa qajetti ekenin, jańa kózqarastar men naqty usynystar jazylǵanyn aıta kelip, kitap avtoryna shyǵarmashylyq tabys tiledi.
