Orazaly Sábden Túrkistandy halyqaralyq deńgeıdegi rýhanı astanaǵa aınaldyrýdy usyndy
ALMATY. QazAqparat - Búgin QR Ulttyq kitaphanasynda Elbasynyń strategııalyq mańyzy joǵary «Nurly jol - bolashaqqa bastar jol» qujatyna oraı akademık-ǵalym, ekonomıka ǵylymdarynyń doktory, professor, Qazaqstan Ǵalymdar Odaǵynyń Prezıdenti Orazaly Sábdenniń dárisi ótti.
Ekonomıst ǵalym Prezıdent joldaýynan alǵan áserlerin, alǵa qoıǵan mindetterdi júzege asyrý jónindegi oı-josparlaryn ortaǵa saldy. Sondaı-aq, ol ǵylymı eńbekteriniń 22 tomdyq jınaǵyn Ulttyq kitaphanaǵa tabys etti.
Shara barysynda ǵalym «Túrkistan óńiri» rýhanı-jańa tehnologııalyq klasterin qurý týraly jańa jobasynyń tusaýkeserin ótkizdi.
«Jańa Túrkistan» jobasynyń negizgi mıssııasy - tarıhymyzda tuńǵysh ret bir aımaq mysalynda ejelgi Túrkistandy halyqaralyq deńgeıdegi rýhanı astanaǵa aınaldyrý. Adamzattyń rýhanı damýyn maqsat tutqan eki joba da qazaq, aǵylshyn, orys tilderinde kitapsha etip basylyp shyqty. Bul tek qana mádenı turǵydan damýdy qamtamasyz etpeıdi, jańa joba arqyly ınnovatsııalyq damý múmkindiginiń Qazaqstandyq jańa úlgisin dúnıejúzine kórsetýge septigin tıgizbek. «Eger Astana 21 ǵasyrdyń modern qalasy bolatyn bolsa, Túrkistan eski naqyshta bizdiń tarıhymyzdy kórsetetin úlken qubylys bolaıyn dep otyr. Ózbektiń de, qyrǵyzdyń da, tájiktiń de joly Túrkistannan ótedi. Orta Azııanyń joly ótedi. Túrkistannan úlken logıstıkalyq HAB jasaý kerek. Logıstıka degenimiz qazaqsha aıtqanda «aqsha». Barlyq kólik sol jerden ótedi. Túrkistannyń 33 paıyz baılyǵyn sol logıstıka bereıin dep tur», - dedi Orazaly Sábden.
