Orazaly Dosbosynovty eske túsirýge arnalǵan aıtys ótedi
ALMATY. 1 qarasha. QazAqparat /Erlik Erjanuly/ - Almatyda 2 qarasha kúni Abaı atyndaǵy Qazaq ulttyq pedagogıkalyq ýnıversıtetinde ýnıversıtetaralyq jas aqyndar aıtysy ótkiziledi. «Aqynmyn sózi jeter san ǵasyrǵa» degen atpen ótetin bul sóz dodasy aıtys óneriniń aqtańgeri Orazaly Dosbosynovty eske alýǵa arnalyp otyr.
Orazaly Jarylqasynuly 1975 jyly 15 qarashada týyp, Almaty oblysy Raıymbek aýdanynda ómirge kelip, 2004 jyldyń 30 qazanynda jol-kólik apatynan mezgilsiz kóz jumǵan edi.
Atym Oraz bolǵanmen,
Otyzdan jasym aspaǵan,
Iegin saqal jappaǵan,
Súıinbaımyn, Jambylmyn,
Tańjaryqpyn, Sharǵynmyn,
Basynan sóz aspaǵan!
Kódekten qalǵan bir ulmyn,
Qaımyqpaı sóıler patshadan.
Qulmambetten qalǵan qulynmyn -
Halyqtyń ózi baptaǵan, - dep jyrlaǵan O. Dosbosynov 29 jyl ómir súrgenimen jasyndaı jarqyldap ótti. Ulttyq ónerdiń janashyrlarynyń súıiktisine aınalyp, artynda óshpes izin qaldyrǵan onyń esimin ulyqtaýdy ózi bilim alǵan Abaı atyndaǵy Qazaqtyń ulttyq pedagogıkalyq ýnıversıteti ıgilikti istiń bastamashysy bolyp otyr. Bul alamanǵa Qazaq memlekettik qyzdar pedagogıkalyq ýnıversıtetiniń, Ál-Farabı atyndaǵy Qazaq ulttyq ýnıversıtetiniń, Halyqaralyq aqparattyq tehnologııalar ýnıversıtetiniń, Q.Sátpaev atyndaǵy ulttyq tehnıkalyq ýnıversıtetiniń, Qazaq ulttyq agrarlyq ýnıversıtetiniń, T.Júrgenov atyndaǵy Qazaq ulttyq óner akademııasynyń, S.Demırel atyndaǵy ýnıversıtettiń aıtysker stýdentteri qatyspaq.
