«Orazalın ornynda qaldy» - respýblıkalyq basylymdarǵa sholý
***
«Egemen Qazaqstan» gazetiniń búgingi sanynda «Olımpıada chempıony - Almaty qalasynyń qurmetti azamaty» atty materıal basyldy. Jeksenbi kúni Almatynyń jaqsy oqıǵasynyń biri grek-rım kúresinen Olımpıada chempıony Jaqsylyq Úshkempirovtiń «Almaty qalasynyń qurmetti azamaty» atanýy boldy. Sportsúıer qaýymnyń kóńilinen shyqqan ıgi is demalys kúni Almatydaǵy Ortalyq stadıonda ótken Qazaqstan Respýblıkasynyń fýtbol chempıonatynyń kezekti oıynynyń bastalýymen oraılastyrylǵan edi. Almaty qalasynyń ákimi Ahmetjan Esimov osy oıyndy tamashalaýǵa shaqyrylǵan Olımpıada chempıonyn laıyqty ataǵymen ulyqtady.
***
«Qazaqstannyń qaı qalasyna barsańyz da, ala tańnan qazaq áıeli kóshe sypyrady. Temeki tuqylyn, qaqyryq-túkirikti jınap júredi. Qabaqtary qatý. Adal jar, aıaýly analarǵa qysy-jazy bazarda paket satqyzyp qoıǵan da - sol baıaǵy qý tirliktiń qamy»,-dep jazady «Alash aınasy» gazeti búgingi sanynda. Basylym bul maqalany «Qazaq áıeli qara jumystan qashan qutylady?» degen taqyryppen jarııalady.
***
«Aıqyn» gazetiniń jazýynsha, Almatyda Qazaqtyń Abaı atyndaǵy memlekettik akademııalyq opera jáne balet teatrynda Qazaqstan Jazýshylar odaǵynyń HIV quryltaıy bolyp ótti. Quryltaıǵa jınalǵan 553 qalamgerdiń arasynan otyzǵa jýyq jazýshy prezıdıým tórindegi qutty oryndaryna jaıǵasqan soń, quryltaı saltanatty túrde Ánuranmen ashyldy. Búginde Jazýshylar odaǵy músheleriniń sany 777-ge jetse, 2007 jyly ótken quryltaıdan beri, ıaǵnı bes jyldyń ishinde qazaq halqy 118 qalamgerinen aıyrylypty. Jazýshylar odaǵynyń basshysy N.Orazalınniń aýzymen osy marqum qalamgerlerdiń esimderi túgel aıtylyp, jazýshylar áriptesterin bir mınýt únsizdikpen eske aldy. Odaq basqarmasynyń esepti baıandamasyn Qazaqstan Jazýshylar odaǵy basqarmasynyń tóraǵasy Nurlan Orazalın jasady. Odaq tóraǵasy óz sózinde jazýshylardyń basyn uıystyryp otyrǵan qara shańyraqtyń eki quryltaı arasynda atqarǵan sharýalaryn ekshep, jetistigi men kemshiligin jaıyp saldy. Jazýshylarǵa kómektesý joldaryn oılastyrýdyń áldeqashan pisip- jetilgenin aıtyp, aýdarma isin óristetý, sheteldermen baılanys máselesin retteý, memlekettik tapsyryspen shyǵatyn kitaptardyń taralymyn 12 myńǵa jetkizý, qarjy jetispeýshiliginen toqtap qalǵan «Syn» jýrnalyn memlekettik tapsyryspen qaıta shyǵarý jaıyn ortaǵa saldy. Maqala «Orazalın ornynda qaldy» degen taqyryppen berilgen.
Osy basylymda «Baılardyń besigi - Azııa» atty materıal basyldy. «Ústimizdegi jyly álemdegi baılardyń qatary birshama tolyqty. Naqty derekter keltirer bolsaq, olardyń sany 0,6 paıyzǵa ósip, 187 380 adamdy quraǵan. Biraq qarjy daǵdarysy olardyń qaltasyn birshama juqartqanǵa uqsaıdy. Baılyǵy 1,8 paıyzǵa tómendep, 25, 775 trıllıon dollardy quraǵan. Bul qarajatqa kedeıdiń kózimen qarasańyz, sumdyq. Al ózderi jaǵdaılarynyń shatqaıaqtaǵanyn jıi aıtady»-dep jazady gazet. Bir qyzyǵy, buǵan deıin qaltalylardyń kóptigi jóninen aldyna eshkimdi salmaǵan Soltústik Amerıka bir saty tómendepti. Mıllıonerler mekendegen qurlyqtyń aldynda Azııa tur.
***
Serik Jeksenbaev atty kásipker qazaqstandyq qyz-kelinshekterdi sán saltanatpen qamtamasyz etý maqsatynda olardy jylqy sútine shomyldyrý dástúrin jańǵyrtqysy keledi. Onyń paıymdaýynsha, osy ǵajaıyp ádistiń ásemdikke áseri mol jáne Ejelgi Mysyrda ómir súrgen Kleopatra da jylqy sútine udaıy shomylyp otyrǵan kórinedi. Bul týraly «Ekspress-K» basylymynda jaryq kórgen «Djakýzı ız kýmysa» degen taqyryptaǵy maqalada baıandalǵan. Basylymnyń atap ótýinshe, qymyzdyń sýsyn retinde paıdasy barlyǵyna aıan, alaıda onyń kosmetıkalyq erekshelikterin elemeı júrmiz.
