Orazáli Dosbosynovty eske alýǵa arnalǵan jas aqyndar aıtysynyń jeńimpazdary anyqtaldy

ASTANA. QazAqparat - Búgin L.Gýmılev atyndaǵy Eýrazııa ulttyq ýnıversıtetiniń kontsert zalynda aıtys ónerinde aldaspandaı jarqyldap, qaıtalanbas qoltańbasyn qaldyrǵan shynaıy talant, jyr jampozy - Orazáli Dosbosynovty eske alý maqsatynda uıymdastyrylǵan «Qulmambettiń qulyny» atty jas aqyndar aıtysy ótti.

Aıtysty belgili aıtysker aqyn, fılologııa ǵylymdarynyń kandıdaty, respýblıkalyq aıtystardyń jeńimpazy Serikzat Dúısenǵazy júrgizdi.

Qazylar alqasynyń quramynda ádebıettanýshy, folklorıst, fılolgoııa ǵylymdarynyń doktory, akademık, L.N. Gýmılev atyndaǵy Eýrazııa ulttyq ýnıversıtetiniń qazaq ádebıeti kafedrasynyń meńgerýshisi Seıit Qasqabasov, Astana qalasy tilderdi damytý basqarmasynyń basshysy Erbol Tileshov , Memleket jáne qoǵam qaıratkeri, Qazaqstan Respýblıkasy Ulttyq sport túrleri qaýymdastyǵynyń prezıdenti, belgili jyraý Bekbolat Tileýhan, Qazaqstannyń eńbek sińirgen qaıratkeri, aıtysker, jyrshy-termeshiler odaǵynyń basshysy Júrsin Erman, aıtysker aqyndar Marjan Esjanova, Balǵynbek Imash boldy.

Qazylar alqasynyń sheshimimen birinshi orynǵa aqtóbelik Danııar Aldabergen men elorda atynan shyqqan Tańjaryq Erjan ıe boldy. Olar 250 myń teńge aqshalaı syılyqqa ıe boldy. Al ekinshi oryndy (150 myń teńge) taldyqorǵandyq Aıagóz Serikqyzy men qaraǵandylyq Botakóz Muhıden aldy. Úshinshi oryndy (100 myń teńge) tarazdyq Darhan Ábdimanat pen OQO atynan shyqqan Dáýren Ysqaq ıelendi.