Orazaqyn Asqarmen qoshtasý rásimi Almatyda ótedi
ASTANA. QazAqparat - Búgin dúnıeden ótken belgili aqyn, qoǵam qaıratkeri Orazaqyn Asqardy aqtyq saparǵa shyǵaryp salý rásimi Almatyda ótedi, dep habarlaıdy QazAqparat.
«Belgili aqyn, qoǵam qaıratkeri Orazaqyn Asqardy aqtyq saparǵa shyǵaryp salý rásimi 25 qańtar kúni Almatydaǵy Jazýshylar odaǵynda ótedi. Janaza saǵat 10.00-de bastalady», - dedi QR Mádenıet jáne sport mınıstrliginiń baspasóz hatshysy Aıdar Qyryqbaı.
Eske sala ketsek, búgin qazaqtyń belgili aqyny Orazaqyn Asqar 84 jasqa qaraǵan shaǵynda dúnıeden ozdy.
Orazaqyn Asqar 1935 jyly Qytaı Halyq Respýblıkasynyń Іle aımaǵynda dúnıege kelgen. Qulja qalasynda gımnazııany bitirip, Úrimji qalasyndaǵy Ulttar ınstıtýtynyń til jáne ádebıet fakýltetine túsken. Qosymsha «Shyńjań gazeti» redaktsııasyna qyzmetke turǵan. 1955 jyly atamekeni Qazaqstanǵa kóship kelip, 1961 jyly Qazaq memlekettik ýnıversıtetiniń fılologııa fakýltetin bitirip shyǵady.
Biraz jyl Qazaq KSR Ǵylym akademııasynyń Sh. Ýálıhanov atyndaǵy Tarıh, etnografııa jáne arheologııa ınstıtýtynda kishi ǵylymı qyzmetker, odan keıin Qazaqstan Jazýshylar odaǵynyń kórkem ádebıetti nasıhattaý bıýrosynda nusqaýshy, respýblıkalyq Kitap palatasynda bólim meńgerýshisi, «Jalyn» baspasynda aǵa redaktor bolǵan. Jyldar boıy qazaqtyń qara óleńin el ishinen jınap, eki tomyn bastyrdy. «Ádebı mura» baǵdarlamasyna oraı, «Álem balalar ádebıetiniń» qazaq tilindegi elý tomdyǵyn shyǵarý jumysyna atsalysty.
Qazaqstan Respýblıkasynyń Mádenıet jáne sport mınıstri Arystanbek Muhamedıuly qoǵam qaıratkeriniń dúnıe salýyna oraı kóńil aıtty.
