Orazada Almatynyń 4 meshitinde Quran qatym túsirilmeıdi

ALMATY. QazAqparat- Orazada megapolıstiń 4 meshitinde Quran qatym túsirilmeıdi, tek Taraýyq namazy oqylady. Bul týraly Óńirlik kommýnıkatsııalar qyzmetiniń alańynda ótken baspasóz máslıhatynda Almaty qalasynyń bas ımamy Tólebı qajy Ospan málim etti, dep habarlaıdy QazAqparat tilshisi.

«Almaty meshitterinde qasıetti Ramazan aıyn atap ótý úshin arnaıy jospar bekitildi. Oraza aıyna qaladaǵy barlyq meshittiń daıyndyǵy pysyqtaldy. Bıyl qaladaǵy 54 meshittiń 50-inde Taraýyq namazynda Quran hatym túsiriledi. Qalǵan 4 meshitte, ıaǵnı Medeý aýdanyndaǵy «Ismıhan» meshiti, Naýryzbaı aýdany «Kúlıza ana» meshiti, Túrksib aýdanynda ornalasqan «Makka» men «Ar-Rahım» meshitinde Taraýyq namazy Quran qatymsyz oqylady»,- dedi shahardyń bas ımamy. Sonymen qatar ol Almaty ortalyq meshitinde «Ramazan shatyry» qurylyp, kúndelikti 500 kisige aýyzashar dastarhany jaıylatynyn aıtty. «Budan bólek, orazada «Ramazan – izgilik aıy» aıasynda túrli sharalar uıymdastyryldy. Qala turǵyndary arasynda «Jarapazan-Party» baıqaýyn jarııaladyq. Maqsat – oraza aıynda din men dástúrdiń sabaqtastyǵyn dáriptep, kenjelep qalǵan dástúrimizdi jańǵyrtý»,- deıdi ol.

Eske salsaq bıyl Ramazan aıy 23 naýryzda bastalady. Qasıetti Qadir túni - 17 sáýirden 18 sáýirge qaraǵan tún. Al 21 sáýir - Oraza aıttyń birinshi kúni.