Oraza kezinde Astana meshitteri kúnine 1 myńǵa jýyq jamaǵatqa aýyzashar beredi
ASTANA. QazAqparat - Oraza kezinde Astana meshitteri kúnine 1 myńǵa jýyq jamaǵatqa aýyzashar beredi. Bul týraly búgin baspasóz máslıhatynda Qazaqstan musylmandary dinı basqarmasynyń Astana boıynsha ókili, «Nur Astana» meshitiniń bas ımamy Naýryzbaı qajy Ótpenov málim etti.
«Bir aıǵa jalǵasatyn ulyq mereke - Ramazan aıy bıyl 28 maýsymda bastalady. 27 maýsym kúni elordadaǵy barlyq meshitterde Taraýyq namazy oqylady. Onda qarılarymyz hatym quran túsirýge nıet bildirýde. Sondaı-aq Ramazan aıynda qala meshitteri kún saıyn myńǵa tarta jamaǵatqa arnap aýyzashar uıymdastyratyn bolady», - dedi ol.
Máselen, «Nur Astana» meshiti 300 kisige, «Áziret Sultan» meshiti - 400, «S. Ǵylmanı» meshiti - 150, «Tólebaı» meshiti - 30, «Sheıh Kýnta qajy» - 20, «Ás-Salam» - 20, Ál-ǵanı meshitinde 120 adamǵa arnap aýyzashar dastarhany jaıylmaq.
Imamnyń aıtýynsha, bıyl pitir sadaqasy 200 teńge kóleminde bekitildi. Shildeniń 23-nen 24-ne qaraǵan tún - Qasıetti Qadyr túni. 28 shilde kúni - Oraza aıt meıramy. Astana qalasy boıynsha Aıt namazy 07:00-de oqylatyn bolady.
