«Oraza qabyl bolsyn!» baǵdarlamasy: Eń kúshti adam kim

ASTANA. KAZINFORM - «Oraza qabyl bolsyn!» tikeleı efırinde bul joly sabyr taqyryby qozǵaldy. Óıtkeni «Ramazan – sabyr aıy». «Minezdiń ishindegi sabyr degenimiz ne?» degen saýalǵa efır tizginin ustaǵan dintanýshy Nurlan Baıjigituly keńinen toqtaldy.

«Qurannyń 70-ke jýyq aıatynda sabyr nelikten erekshe maqtalady?» deı kele, kórkem minezdiń biri - sabyr etý bilý týraly, bos ýaqytty ashý, yza-kekpen emes, bilimmen tolyqtyrý kerek ekenin, sabyr - bala tárbıesindegi eń uly qasıet ekenin aıtty. Sondaı-aq kórermender tarapynan túsken saýaldarǵa da astarly ázil, ádemi qaljyńmen tyńǵylyqty jaýap berdi.

«Iman nege álsireıdi?» degen kórermen suraǵy biraz máseleni ashyp aıtýǵa negiz boldy. Adam musylmandyq paryzdaryna jalqaýlansa, ımannyń álsireıtinin, bilim alýǵa, ǵylym ıgerýge, kásip úırenýge, ózin-ózi damytyp órkendetýge, eńbek etýge, bala-shaǵany asyraýǵa erinse, ony bireý ákelip bermeıtinin aıtty.

«Aıtyńyzdarshy, biz sonshalyqty rýhanı álsiz adam bolǵanymyz ba? Bulaı bolsa, sabyrdyń sary altynyna qalaı jetemiz? Álde «Eı, ıman keltirgender! Sabyr etińder, turaqtylyq tanytyńdar, daıyn ári muqııat bolyńdar» degen Jaratqannyń sózine senbeımiz be?»,- dedi dintanýshy.

Sondaı-aq ol eger, ár adam osy sózge mán berse, bul eshqandaı koých, psıholog, motıvator, trenıngti qajet etpeıtin jáne tabysqa jetýdiń basty qadamy bolar edi dedi. Sondyqtan orazanyń 30 kúninde de ımannyń qalqany bolǵan sabyrǵa júgingen adam eń kúshti adam degen tujyrymmen kórermenge oı saldy.