Oraza aıyna qaramastan, dúkenderimizdiń ishimdikterge lyqa tolyp turýy neni bildiredi - respýblıkalyq basylymdarǵa sholý

***
«Quqyq qorǵaý vedomstvolarynyń birin-biri qaıtalaýyn boldyrmaı, olardyń jumysyn tıimdi etý, álemdik tájirıbeni paıdalana otyryp, burynǵy keńestik júıeniń keleńsiz muralarynan arylý qajet. Biz ótken jyldarda kóp is atqardyq. Muny barlyq álemdik sarapshylar aıtyp otyr. Endi osy reformany atqarý ǵana qaldy. Biz óz azamattarymyzdyń quqyqtary jaqsy qorǵalǵanyn, quqyq qorǵaý júıesiniń ózindegi sybaılas jemqorlyqqa tosqaýyl qoıylǵanyn qalaımyz. Jaýapkershilikti kúsheıtý mańyzdy jáne bul organdardyń árqaısysyn óz isimen aınalysatyndaı etý kerek», dedi Memleket basshysy Nursultan Nazarbaev keshe Aqordada ótken quqyq qorǵaý júıesin reformalaý jumystaryna baılanysty keńeste. Jıynda kóterilgen ózge de birqatar máseleler jóninde bilgińiz kelse, «Egemen Qazaqstan» basylymynyń búgingi sanyndaǵy «Azamattar quqy jaqsy qorǵalýy tıis» atty maqalany qarańyz.

Sondaı-aq osy basylymnyń búgingi sanynda «Qazaqtyń sanasy oıanbaı bári beker» atty tartymdy maqala jarııalanypty. Atalmysh maqalanyń avtory Álkeı Marǵulan atyndaǵy №40 mektep dırektory Erbol Іrgebaıdyń sózine qaraǵanda, qazirgi kúni ana tilin bilmeıtin qazaqtar memlekettik qyzmette de, kásipkerlik salasynda da jetip, artylady. Bıznestegi azamattar bolsa, «Tiliń maǵan ne berdi? Men el ekonomıkasyna qarjy kirgizip jatyrmyn», dep kergıdi. «Al memlekettik, azamattyq qyzmettegilerge ne joryq. Kópshiliginiń úırenemin degen qulqy joq, úırenýge umtylmaıdy da. Olaı deıtinim, qaladaǵy orys tildi nemese aralas mektepterdi alyp qarasańyz, orys synyptaryndaǵy otyrǵan oqýshylardyń 80 paıyzǵy jýyǵy ózimizdiń qarakózder. Eger tilge, ultqa jany ashysa, keleshekte qazaq tilin bilmeı qyzmet isteý múmkin emestigin sezinse, ata-analary bulaı istemegen bolar edi», deıdi maqala avtory.

***

«Alash aınasy» basylymynyń habarlaýynsha, qazir sharıǵat úırenip, dinı saýat ashqysy kelgen qazaq jastary shetelge baryp, bilim alyp kelýge májbúr. Ádette olardyń elge oralǵandaryn birden ımamdyqqa shyǵaryp nemese bilim ordalaryna ustaz etip qoıamyz. Din Islam bireý bolǵanymen álemdegi ıslam memleketteriniń sany kóp. Olar tarıhy, jaǵrapııalyq mekeni, saıası jaǵdaıy boıynsha, ártekti bolyp keledi. Osy qajettilikten Islamda «mazhab» degen uǵym paıda boldy. Qarapaıym túrde aıtqanda, «mektepter», «quqyqtyq erekshelikter» degenge saıady. Bul másele «Alash aınasy» basylymynyń búgingi sanyndaǵy «Jamaǵattar jaǵrapııasy» atty maqalada.

Sondaı-aq atalmysh basylymnyń jazýynsha, búginde Qazaqstan halqynyń basym bóligi - musylmandar. Soǵan qaramastan, azamattarymyz ıslam qundylyqtaryn oń túsinip, sharttaryn durys oryndamaı jatqandaı. Sebebi ózge ıslam memleketteri oraza aıyna erekshe daıyndyqpen keledi, tipti bir aı boıyna qamdanady. Azamattardyń barlyq tazalyqty saqtaýyna jaǵdaı jasaıdy, azamattar da jaman qylyqtarynan barynsha arylýǵa tyrysady.

Al biz áli de bolsa samarqaýmyz. Máselen oraza aıyna qaramastan, dúkenderimizde ishimdikterdiń neshe túri lyqa tolyp turady. Meıramhana, kafe jáne basqa da oryndarda «aram sýlar» úzilissiz satylady. Jalpy oraza aıyna daıyndyq qalaı bolýy kerek ? Bul týraly «Alash aınasy» basylymynyń osy sanyndaǵy «Qasıetti aıǵa taǵy da daıyndyqsyz keldik» atty maqalada.

***

«Qazaqstan Eýropadaǵy qaýipsizdik jáne yntymaqtastyq uıymy aıasyndaǵy 56 memlekettiń ortaq kelisim alańyn qalyptastyrdy.

Bul elde EQYU sammıtiniń ótýi zańdy. Sebebi uıymǵa múshe memleketterdiń barlyǵy Qazaqstanǵa osyndaı mańyzdy sharany uıymdastyrýdy senip tapsyryp otyr. Bul - tek Qazaqstan úshin ǵana emes, halyqaralyq uıym úshin de úlken mańyzy bar asa jaýapty mindet. Óıtkeni Sammıt EQYU-nyń qyzmetine jańa, tyń serpin beredi degen úmit bar. Sammıttiń ótkizilmegenine mine 11 jyl bolypty. Al álemde úlken ózgerister bolyp jatyr. Olardyń biri jaǵymdy, biri jaǵymsyz. Aımaqtarda áli sheshilmegen túıtkildi máseleler bar. Memleket ókilderiniń arasynda jańa kózqaras alshaqtyqtary da paıda bolýda. Sondyqtan da bul qaýipsizdikti nyǵaıtyp, memleketter arasyndaǵy yntymaqtastyqty arttyrý baǵytyndaǵy óte úlken oqıǵa bolady», dep jazady «Aıqyn» basylymy búgin shyqqan sanynda. Bul týraly basylymdaǵy «Qazaqstanda EQYU sammıtiniń ótýi zańdylyq» atty maqalada jan jaqty aıtylǵan.

Sondaı-aq atalmysh basylymnyń jazýynsha, Ulttyq áýe tasymaldaýshy - «Eır Astana» memleket aktıvterin jetkilikti deńgeıde tıimdi basqara almaı otyr. Ulttyq kompanııa azamattyq avıatsııanyń damýyna da jol asha almaýda. Ulttyq áýe kompanııasy jumys istegen ýaqyt aralyǵynda birde-bir áýe kemesi jeke menshikke satyp alynbaǵan. «Eır Astananyń» jolaýshylar men júk tasymaly úshin paıdalanylǵan ushaqtardyń barlyǵy operatsııalyq lızıngte turǵan. Olardyń keıbireýi 20 jyldan astam ýaqyt paıdalanylyp keledi eken. Esep komıtetiniń derekterine qaraǵanda, byltyr lızıngtik tólemder boıynsha jalpy shyǵyn 404,8 mıllıon dollarǵa shyqqan. Atalǵan másele týraly jan-jaqty aqparat alǵyńyz kelse, «Aıqynnyń» búgingi sanyndaǵy «Esep komıtetiniń esebin kim eskeredi ?» atty maqalany qarańyz.

***

«Kazahstanskaıa pravda» basylymynyń habarlaýynsha, elordada azamattardyń turǵyn úı salasyndaǵy quqyqtaryn qorǵaıtyn «Pravo na jıle» atty jańa qoǵamdyq birlestik jumysyn bastady. Atalmysh uıym ókilderi úleskerler men nesıege úı alýshylarǵa, mansardy satyp alýshylarǵa jáne ózge de el azamattaryna qol ushyn sozyp, olardyń buzylǵan quqyqtarynyń qalpyna keltirýge yqpal etpekshi. Jańa qurylǵan uıymnyń jumys tásili men bolashaq josparlary jóninde «Kazahstanskaıa pravda» basylymynyń búgingi sanyndaǵy «Dostoınyı dohod - v pravovom pole» atty maqaladan oqı alasyz.

***

«Lıter» basylymynyń jazýynsha, Qazaqstan ekonomıkalyq ósim jaǵynan Reseıdi basyp ozdy. Elimiz postkeńestik elder arasynda ekonomıkalyq ósim jaǵynan lıder bolyp otyr. Bul málimetterdi TMD-nyń Statıtıkalyq komıteti taratqan. Ondaǵy derekter boıynsha Qazaqstandaǵy ishki jalpy ónimniń ósimi 8,3 paıyzdy qurap otyr. Eń qýanyshtysy, qarqyndy ósim, ásirese ónerkásip sektorynda baıqaldy. Buny elimizdiń ındýstrııalyq-ınnovatsııalyq strategııasynyń alǵashqy nátıjeleri dep bilý kerek. Bul jaıly «Lıter» basylymynyń búgingi sanyndaǵy «Obognalı VVP» atty maqalada jan-jaqty ashyp kórsetilgen.