Oraza aıt - meıirimdiliktiń, birliktiń, qaıyrymdylyq pen shattyqtyń merekesi - Bas múftı Erjan qajy Malǵajyuly
ASTANA. QazAqparat - Búgin Oraza aıttyń alǵashqy kúni. Musylman qaýymnyń osy ulyq merekesi - oraza aıt meıramynyń bastalýyna oraı Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly barsha jamaǵatqa quttyqtaý joldady.
Qurmetti baýyrlar!
Oraza aıt merekesine aman-esen jetkizgen Alla taǵalaǵa sansyz shúkirler men madaqtar bolsyn. Barsha otandastarymdy musylman qaýymynyń ulyq, qasterli merekesi - Oraza aıt meıramynyń bastalýymen quttyqtaımyn. Aıt múbárak bolsyn!
Qasıetti Ramazan aıynyń aıaqtalǵanyn bildiretin Oraza aıt - meıirimdiliktiń, ıgiliktiń, birliktiń, izettiliktiń, qaıyrymdylyqtyń, dostyq pen shattyqtyń merekesi. Oraza aıt ulttar men ulystardy yntymaqqa uıystyrady. Imandy kúsheıtip, keńpeıil, baýyrmal, qonaqjaı halqymyzdy jaqsylyqqa, qaıyrly is jasaýǵa jeteleıdi.
30 kún orazada halqymyz yjdahattylyqpen aýyz bekitti. Meshitterimizde aýyzasharlar men qaıyrymdylyq is-sharalar uıymdastyrylyp, turmys jaǵdaıy tómen otbasylaryna kómek kórsetildi. El ıgiligi úshin qyzmet etip júrgen kóptegen azamattar jaqsylyqqa úles qosyp, saýaby mol amaldarǵa atsalysty. Barshasyna «Alla razy bolsyn» degim keledi.
«Aıt» sózi «qarymta» degen maǵynany bildiredi. Jaratýshy Iemiz árbir izgi amal men ıgilikti istiń saýabyn berip, meıirim-shapaǵatyn tógedi.
Aıt kúninde ǵusyl quıynyp, jupar ıis sebinip, jamaǵatpen aıt namazyna qatysýdyń saýaby mol. Týǵan-týystardy, kórshilerdi, dos-jarandy merekemen quttyqtap, dastarhan jaıyp, ulyq meıramnyń sáni men saltanatyn arttyrý - Oraza aıttyń ózine tán jarasymdy hám saýapty amaldarynan. Osy merekede ózara renjisken kisilerdi tatýlastyrsaq, ózgeniń qate-kemshiligin keshirip, ata-anamyzdyń qurmeti men rızalyǵyna bólensek, ol da - musylmanǵa tán sıpat. Islamda árbir izgi amal - sadaqa. Kórshige kómektesý, muqtajǵa qol ushyn berý, tipti jetimniń basyn sıpap, ózgelerge jyly shyraı tanytý, ol da - sadaqa.
Kúndegi orazasyn qurmamen ashýdy súnnet etken Paıǵambarymyz (s.ǵ.s) aıt namazyna bararda aldymen qurmadan dám tatyp baryp úıinen shyqqandy unatatyn. Oraza aıtta otbasymyzdy shattyqqa bólep, aǵaıynǵa syılyq berýdiń de mańyzy zor.
Alla taǵala ustaǵan orazalarymyzdy, duǵa-tilekterimizdi qabyl etkeı! Halqymyzdyń birligi men yntymaǵy artyp, Táýelsizdigimizdiń tuǵyry bıik, egemendigimiz máńgi baıandy bolǵaı! Ámın!, - delingen Bas múftıdiń quttyqtaýynda.
