ORAZA - 2016: Mán berer málimetter

- Bıylǵy Ramazan aıy 6 maýsymda bastalady. Bıyl musylmandyq aı kúntizbesi boıynsha oraza 29 kún.

- Osy jolǵy Oraza kúnniń eń uzarǵan sátine sáıkes kelip otyr. Tańnyń atýy men kúnniń batýy 17-18 saǵatqa deıin sozylady. Alaıda kúnniń uzaqtyǵy men shildeniń aptap ystyǵy otandastarymyzdyń oraza ustaýyna kedergi keltirmeıdi dep senemiz. Óıtkeni, Ramazan - jylyna bir ret keletin, saýaptar eselenip jazylatyn berekeli, qasıetti aı. Musylman balasy mundaı múmkindikter aıyn jiberip almaýǵa tyrysady.

- Bas múftı Erjan qajy Malǵajyulynyń tóraǵalyǵymen ótken QMDB Tóralqa májilisinde ókil ımamdardyń biraýyzdan kelisýimen Ramazan aıynda beriletin pitir sadaqa mólsheri 200 teńge bolyp bekitildi. Pitir sadaqany Ramazan aıynyń birinshi kúninen bastap, Oraza aıt namazyna deıin berýge bolady.

- Pitir-sadaqadan túsken qarajat esebinen múgedekter men qarttarǵa, jesir áıelder men jetimderge, áleýmettik turmysy tómen otbasylaryna qaıyrymdylyq kómek kórsetiledi.      

- Qasıetti Qadir keshi - shildeniń 1-nen 2-sine qaraǵan tún. Qadir túninde meshitterde tańǵa deıin rýhanı baǵdarlamalar uıymdastyrylady. Ýaǵyz aıtylyp, Quran oqylyp, jamaǵatpen duǵa jasalady.

- 5 shilde kúni oraza aıt merekesi bastalady. Oraza aıt kúnderi meshit aýlalaryna qazaq úıler tigilip, jamaǵat arasynda ulttyq sport túrlerinen (asyq atý, arqan tartý, qol kúres, gir tasyn kóterý, t.b.) jarystar uıymdastyrylady.

- 5 maýsym kúni quptan namazynan keıin meshitterde taraýıh namazy oqylady. Taraýıh namazy 29 kún oqylyp, qasıetti kitabymyz Quran Kárim tolyq hatym etiledi. Qudaıǵa shúkir, qazir óz elimizden jas qarılar shyǵyp, taraýıh namazyn oqýda. Ótken jyly «Áziret Sultan» meshitinde 14 jastaǵy eń jas qarıymyz, respýblıkalyq Quran jarysynyń Bas júldegeri Dýlat Bolatbekuly taraýıh namazyn ótep, jamaǵattyń alǵysy men qýanyshyna bólendi.

- Jolaýshylarǵa, júkti, etekkiri kelgen nemese omyraýda balasy bar áıelderge, naýqas jandarǵa oraza ustaý - paryz emes.

- Saparda oraza ustamaýǵa bolady. Biraq basqa kúnderde sanyn toltyryp, aýyz bekitedi. Eger sapar qıyndyq týǵyzbasa, abzaly - aýyz bekitý. 

- Júkti nemese omyraýda balasy bar áıelder eger densaýlyǵy men sábıine zııan kelýden qoryqsa, oraza ustamaı keıin qazasyn ótese bolady. 

- Ramazan kezinde etekkiri kelgen nemese bosanǵan áıeldiń orazasy buzylady. Mundaı jaǵdaıda aýzyn ashyp, keıinnen ustamaǵan kúnderdiń qazasyn óteıdi.

- Ramazan aıy qarsańynda Bas múftı Erjan qajy Malǵajyuly musylman qaýymyna Úndeý joldap, halqymyzdy orazanyń ár kúninde jaqsylyq jasap, qaıyrymdylyq is-sharalarǵa atsalysýǵa shaqyrdy. Sonymen qatar, kásipkerlerdi turmysqa qajetti zattarǵa jeńildik jasaýǵa, jamandyqtyń bastaýy bolǵan araq-sharap satpaýǵa úndedi. 

- Qasıetti aıdyń qarsańynda Almatydaǵy Respýblıka saraıynda, Astanadaǵy Beıbitshilik jáne kelisim saraıynda, oblystardaǵy mádenıet úılerinde «Qosh keldiń, Ramazan!», «Berekeli mereke», «Berekeli Ramazan» degen taqyryppen rýhanı-mádenı, patrıottyq keshter uıymdastyryldy.

- Jyl saıynǵy dástúr boıynsha Ramazan aıynyń qurmeti úshin «Tegin taksı», «Tegin avtobýs», «Qaıyrymdylyq - qaıyrly is», «Baryńmen bólis», t.b. qaıyrymdylyq aktsııalar uıymdastyrylady.

- Taraýıh namazdarynan keıin jamaǵat úshin meshit aýlalaryna arnaıy avtobýstar qoıylyp, turǵyndar tegin jetkiziledi.

- Elimizde aýyzashar berýdiń qazaqy-musylmandyq merekelik mádenıeti qalyptasa bastady. Aýyzasharlarda tek ýaǵyz-nasıhat aıtylyp qana qoımaı, arnaý, jyr-tolǵaý, termeler oryndalyp, ósıetti óleńder oqylady. Sonymen qatar, jyly lebizder men tilekter aıtylady. Oraza, ımandylyq, birlik, izgilik týraly ǵıbratty beınerolıkter kórsetilip, taǵylymy mol, adam órisin damytatyn vıktorınalyq suraqtar qoıylady. Jeńimpazdar qundy syılyqtarmen marapattalady.