«Oralý» fılminiń shaıqas sahnalary Belarýs jerinde túsirilip jatyr
ASTANA: QazAqparat - «Qazaqfılm» kınostýdııasy men «Novyı mır prodakshn» kınokompanııasy Jeńistiń 70 jyldyǵyna arnalǵan «Oralý» tarıhı dramasynyń negizgi bóligi Uly Otan soǵysyndaǵy Dnepr shaıqasyn Belarýs jerinde túsirip jatyr, dep habarlady www.24.kz.
Fılmniń bas prodıýseri - Álııa Nazarbaeva. Fılm jetimdikti bastan keship, jat elde júrip, qıyndyq kórse de taǵdyrdyń taýqimetine tótep bergen Іlııas esimdi jigittiń taǵdyryn baıandaıdy. Aıdaýda júrgen ol anasyn saǵynyp, qalaı bolǵanda da týǵan jerine oralatynyna senedi. Týyndyda ananyń perzentine degen sheksiz mahabbaty, ulynyń Otanyna degen adaldyǵyn kórsetýdi maqsat etken.
«Bul kartına álemniń qaı elinde kórsetilse de, qyzyqty ári túsinikti bolady dep oılaımyn. Sebebi bas keıipkerdiń taǵdyry arqyly bútin bir dáýirdiń tynysyn berýge tyrystyq», - deıdi «Oralý» fılminiń rejısseri:. Aqan Sataev.
Belarýs elinde fılmniń 30-dan asa qoıylymdaryn túsirý josparlanǵan. Uly Otan soǵysy jyldaryndaǵy eń alapat, surapyl shaıqastardyń biri - Dnepr úshin shaıqasty túsirý 12 kúnge sozylmaq. Tarıhty jańǵyrtyp, sol kezeńdi bastan keshirý biz úshin úlken mektep boldy, - deıdi akterler.
- «Sol dáýirdi sezinýarqyly ata-babalarymyzǵa degen qurmetimiz kúsheıe túsýde. Olardyń qandaı qıyndyqtan ótkeni, el úshin jer úshin janyn pıda etken. Men ózim úshin osy jaǵynan ádemi áser alýdamyn», deıdi akter Ádil Ahmetov.
Fılmdi túsirýge Qazaqstan, Belarýs, Reseı, men Ýkraınanyń eń úzdik kınogerleri shaqyrylǵan. Kásibı kaskaderler men pırotehnıkter fılmniń sapaly shyǵýy úshin ter tógýde. Jalpy sahnalyq túsirilimderge 500 myńnan astam adam tartylyp, 300-deı áskerı saýyt saımandar paıdalanylǵan.
Kelesi túsirilim Ázerbaıjan elinde jalǵasady. Fılmniń alǵashqy kórsetilimi táýelsizdik merekesi qarsańynda jeltoqsan aıyna josparlanyp otyr.
