Oralmandarǵa kórsetiletin áleýmettik qoldaý kólemi olardyń ornalasatyn aımaqtaryna qaraı jikteletin bolady

 Bul týraly búgin QR Parlamenti Májilisinde kóshi-qon salasyndaǵy zańnamalardyń halyqaralyq tájirıbesine arnalǵan semınar  barysynda QR Eńbek jáne halyqty áleýmettik qorǵaý mınıstrliginiń Jaýapty hatshysy Tamara Dúısenova osylaı málim etti, dep habarlaıdy QazAqparat.

«Zań jobasynda etnıkalyq mıgratsııa saıasatyndaǵy sabaqtastyqty saqtaýmen qatar, ıaǵnı azamattardyń kóship kelýi úshin kvota jáne  oralman mártebesin berýmen qatar birshama ózgerister de qamtylyp otyr. Atap aıtqanda, shetelderde turatyn etnıkalyq qazaqtarmen, onyń ishinde tarıhı otanyna kóshkisi keletindermen jumys isteýdegi Qazaqstan Respýblıkasynyń sheteldik mekemeleriniń roli arta túsedi. Budan basqa, etnıkalyq qazaqtardyń kóship kelýi úshin  ótinish berý tártibi ózgertiledi. Eger buryn kvotaǵa jáne oralman mártebesine ótinish Qazaqstan Respýblıkasyna kelgennen keıin berilse, jańa jobada ondaı ótinishterdi Qazaqstan Respýblıkasynyń shetelderdegi mekemeleri arqyly berý múmkindigi qarastyrylýda. Máselen, sheteldik otandastar Qazaqstannyń sol eldegi mekemesine óziniń ótinishin beredi, bul ótinishte oralmannyń elimizdiń qaı óńirine ornalasqysy keletin nıeti de kórsetiledi. Al sol ótinish kórsetilgen oblysqa tabystalyp, onda oralmannyń kóship kelip, ornalasýyna múmkindikteriniń barlyǵy týraly kelisim alynady. Budan keıin jańaǵy azamat otbasymen Qazaqstanǵa kelip óziniń kórsetken oblysyna ornalasyp, áleýmettik qoldaýlaryn alatyn bolady», dedi Tamara Dúısenova.

Onyń aıtýynsha, jobaǵa sáıkes oralmandarǵa kórsetiletin áleýmettik qoldaý kólemi olardyń ornalasqan aımaqtaryna qaraı jikteletin bolady. «Ótken jyly biz «Nurly kósh» baǵdarlamasyn qabyldaǵanbyz. Soǵan sáıkes, respýblıkamyzdyń soltústigine kóship keletin otbasylarǵa beriletin áleýmettik toptama ońtústik óńirdegilerge qaraǵanda eki esege kóp bolady. Bul rette ımmıgratsııa kvotasyna qosylǵannan keıin mindettelgen sharttardy oryndamaǵan jaǵdaıda, áleýmettik qoldaý túrinde alǵan qarajatty qaıtarý mindettemesi engiziledi. Qazirgi kúni oralmandardyń 60 paıyzy ońtústik óńirlerge shoǵyrlanǵan», dedi Jaýapty hatshy.

Sonymen birge, zań jobasynda gýmanıtarlyq jáne saıası jaǵdaılar boıynsha ımmıgranttar sanaty tolyǵyp otyr. Máselen, buryn bul sanatta bosqyndar jáne saıası baspana beriletin tulǵalar bolatyn. Endi osy tapqa mıssıonerler men eriktiler, Qazaqstan Respýblıkasyna qaıyrymdylyq, gýmanıtarlyq kómek kórsetý jáne granttar berý maqsatynda halyqaralyq kelisimsharttar aıasynda keletin ımmıgranttar da qosylýda. «Immıgranttardyń bul sanatynyń Qazaqstan aýmaǵynda kirý maqsatynda qarastyrylǵan qyzmetterden basqa sharalarmen aınalysýǵa quqy bolmaıdy», dedi T. Dúısenova.