Oralmandarǵa eń birinshi kezekte turǵyn úı salý úshin jer telimderin berýdi sheshý kerek - Q. Aıtahanuly

ASTANA. QazAqparat - Oralmandarǵa eń birinshi kezekte turǵyn úı salý úshin jer telimderin berýdi sheshý kerek. Búgin Senattyń jalpy otyrysynda oralmandardyń tarıhı otanyna oralýyn yntalandyratyn zańdy talqylaý barysynda senator Qýanysh Aıtahanov osy máseleni kóterdi.

Depýtattyń sózine qaraǵanda, búgin qabyldanǵan qujat Qazaqstannyń demografııalyq úderisterin jaqsartyp, shet eldegi qandastarymyzdy Atamekenine oralýyna baılanysty jeńildikterdi qarastyrady.

«Zań jobasynda oralmandarǵa jeńildiktermen qatar, tutyný kredıtteri men turǵyn úı qurylysyna ıpotekalyq qaryz alý quqyǵy beriledi dep jazylǵan. Bul óte durys, tolyq qoldaýǵa bolady, oralmandardyń turaqtanýyna qolaıly jaǵdaılar da jasaıdy. Alaıda, memleket turǵyn úı salýǵa ıpotekalyq qarjy beretin bolsa, onda oralmandar eń aldymen jer alýy kerek. Mine, osy turǵydan alǵanda oralmandarǵa jer telimderin berý máselesi qaralmaǵan. Olarǵa berilmeıdi. Sondyqtan da, oralmandarǵa eń aldymen turǵyn úı salýǵa jer telimderin berý kerek dep esepteımin. Baspana salýǵa jer berilmese, ol úshin ıpoteka berýdiń qajeti qansha», - dedi Qýanysh Aıtahanuly.

Sonymen qatar, senator ońtústik óńirlerde oralmandar úshin jer telimderin berý máselesi tipti ózekti ekenin tilge tıek etti. «Biz túpkilikti sheshetin máseleniń biri de sol jerge, jer telimderine qatysty bolyp tabylady. Qazaqstannyń bir óńirinde halyq sany kóp, jer joq, ekinshi bir bóliginde halyq sany da az, jer telimderi de ıgerilmeı bos jatyr. Osyny durys retteý kerek», - dedi ol.