Oralmandarǵa azamattyq alýdy yqtııar hat alǵannan keıin birden berý usynylady - T. Dúısenova
ASTANA. QazAqparat - Oralmandarǵa azamattyq alý quqyǵy týyndaıtyn merzimdi barynsha qysqartý, máselen yqtııar hat alǵannan keıin birden berý usynylady. Búgin Májilistiń Áleýmettik-mádenı damý komıtetiniń uıymdastyrýymen ótip jatqan kóshi-qon úderisterine arnalǵan dóńgelek ústel barysynda Densaýlyq saqtaý jáne áleýmettik damý mınıstri Tamara Dúısenova osylaı málimdedi.
«El aýmaǵy boıynsha oralmandardy qonystandyrý saıasaty, oralman mártebesi týraly máselelerdi, olardy áleýmettik qamsyzdandyrý jáne azamattyq alý quqyǵyn qaıta qarastyrý qajet. Bul rette Qazaqstan Respýblıkasynyń aýmaǵyna kelgen barlyq etnıkalyq qazaqtarǵa oralman mártebesin berý qonystandyrý óńirine qaramastan júzege asýy shart. Qazirgi tańda oralman mártebesi Úkimet aıqyndaǵan óńirlerge kelgen etnıkalyq qazaqtarǵa ǵana berilip keledi. Ekinshiden, jumyspen qamtýdyń belsendi sharalary sheńberinde áleýmettik kómekti Úkimet aıqyndaǵan óńirlerge kóship kelgen oralmandarǵa kórsetý. Sonyń ishinde oralman mártebesin alǵan kúnnen bastap bir jyldyń ishinde basqa óńirlerden kóship kelgenderge osyny qarastyrý kerek», - dedi mınıstr Tamara Dúısenova. Bul rette áleýmettik kómekti Úkimet belgilegen qonystaný aımaqtaryna eldegi basqa aımaqtardan kóship kelgen oralman ala alady. Alaıda, bul aımaqtardan bes jyl tolmaı shyǵyp ketken jaǵdaıda áleýmettik paket memleket paıdasyna qaıtarylatyn bolady.
«Azamattyq alý quqyǵy týyndaıtyn merzimdi barynsha qysqartý, ıaǵnı yqtııar hat alǵannan keıin birden berý usynylady. Búgingi kúni ol yqtııar hat alǵannan keıingi tórt jyldan soń dep qarastyrylǵan. Sonymen qatar, oralman mártebesin berý jeti jyldan bir jylǵa qysqartylady», - dedi T. Dúısenova.
Onyń sózine qaraǵanda, oralman mártebesin alǵan kúnnen bastap bir jyldyń ishinde azamattyq alýǵa ótinish bermegen jaǵdaıda, olardyń elimizde bolýy sheteldik azamattardyń elimizde bolýyna uqsas qarastyrylady.
