Oralmandar jerdi 25 jylǵa jalǵa ala alady

ASTANA. QazAqparat - Oralmandar jerdi aýyl sharýashylyǵy maqsatynda paıdalaný úshin 25 jylǵa jalǵa ala alady. Bul týraly búgin dóńgelek ústel barysynda Astana qalasy Mamandandyrylǵan ekonomıkalyq sotynyń sýdıasy Gúlnár Abdrahmanova málim etti.

Onyń aıtýynsha, Jer Kodeksinde oralmandarǵa jerdi 25 jylǵa jalǵa berý quqyǵy týraly arnaıy norma qarastyrylǵan.

«Oralmandarǵa aýyl sharýashylyǵy óndirisin, aýyl sharýashylyǵy jáne fermerlik sharýashylyqty júrgizý úshin jer ýchaskeleri 25 jylǵa ýaqytsha paıdalanýǵa (jalǵa) berý quqyǵy qarastyrylǵan», - dep atap ótti G.Abdrahmanova.

Sýdıanyń málim etkenindeı, jer shetel azamattaryna satylmaıdy. Ol - tek QR azamattaryna beriletin quqyq.

«Aýyl sharýashylyǵyna arnalǵan jerler QR azamattaryna jáne zańdy tulǵalaryna jekemenshikke aýktsıon arqyly satylady. Jer ýchaskesin onyń kadastrlyq qunynynyń 50 paıyzynan tómen satýǵa ruqsat berilmeıdi. Sonymen qatar QR azamattary men zańdy tulǵalarynyń menshigindegi jalda turǵan jer ýchaskelerin satyp alý úshin jeńildikter beriledi. Atalǵan norma qazirgi jer paıdalanýshylardyń múddelerin eskeredi. Buryn olarǵa berilgen aýyl sharýashylyq jer ýchaskeleri jalǵa berý merzimi aıaqtalǵanǵa deıin, jeńildik baǵamen jeke menshikke satyp alýǵa quqyq beriledi, ıaǵnı jerdiń kadastrlyq qunynyń 50 paıyzy mólsherimen 10 jyl merzimge deıin bólip tóleý múmkindigi qarastyrylǵan», - dep atap ótti sýdıa.

Aıta keteıik, Ult Jospary 100 naqty qadam sheńberinde 35-36 qadamdaryn júzege asyrý maqsatynda Jer Kodeksine ózgerister men tolyqtyrýlar engizilgen bolatyn. Jer Kodeksiniń jańa normalary byltyr qarasha aıynda qabyldandy. Al 2016 jyldyń 1 shildesinde ol qoldanysqa enedi.