Oralmandar Qazaqstan halqynyń 5,5 paıyzyn qurap otyr
ASTANA. QazAqparat - Oralmandar Qazaqstan halqynyń 5,5 paıyzyn qurap otyr. Búgin Májiliste kóshi-qon úderisterine arnalǵan dóńgelek ústel barysynda Ulttyq ekonomıka vıtse-mınıstri Mádına Ábilqasymova osylaı málimdedi.
«Etnıkalyq qazaqtardy elimizge tartý saıasaty sońǵy jyldary demografııalyq jaǵdaıymyzdy jaqsarta tústi. Biz 2011 jylǵa deıin osy baǵyttaǵy kóshi-qonnyń oń saldosyn baıqaǵan bolatynbyz. Sońǵy 2 jylda teris saldo oryn ala bastady. 1991 jyldan 2014 jyldyń 1 qazanyna deıingi aralyqta tarıhı Otanyna oralyp, oralman mártebesin alǵan etnıkalyq qazaq otbasylarynyń sany 258 myń 786-ny qurady. ıAǵnı, Táýelsizdikten beri Qazaqstanǵa kelgen oralmandar sany 952 myń 104 adamǵa jetti jáne búgin olar respýblıka halqynyń 5,5 paıyzyn qurap otyr», - dedi vıtse-mınıstr.
Onyń aıtýynsha, elimizde emmıgratsııalyq úderis dınamıkasy da baıaýlaǵan. Máselen, 2008 jylǵy kórsetkishpen salystyrǵanda 2013 jyly Qazaqstannan ketken adam sany eki esege qysqarǵan.
«Sonymen bir mezgilde, shetelden tartylatyn jumys kúshiniń sany da artyp otyr. Eger 2013 jyly sheteldik jumys kúshi 23 myń adamdy qurasa, qazirgi 1 qazandaǵy jaǵdaıdyń ózinde olardyń sany 30 myń adamǵa jetti. Elimizge keletin eńbek mıgranttarynyń negizgi úlesi Qytaı, Túrkııa, Ýkraına, Ózbekstan men Úndistanǵa tıip otyr», - dedi M. Ábilqasymova.
