Oralman-muǵalimder jumysqa ornalasý úshin qujattyń kóptiginen áýre-sarsańǵa túsip otyr

Búgin QR Parlamenti Májilisiniń jalpy otyrysynda Bilim jáne ǵylym mınıstriniń atyna saýal joldaǵan depýtat Zeınolla Alshymbaev osy máseleni kóterdi.

«Mańǵystaý oblysyna jaqyn shetelderden, atap aıtsaq kórshiles Túrikmenstan, Ózbekstannan kóship kelgen qandas baýyrlarymyz, oralman-muǵalimder máselesi alańdatady. Bular - kórshi respýblıkalardyń pedagogıkalyq joǵary oqý oryndaryn bitirgen ustazdar. Olar bizdiń mektepterimizde óz qyzmetin jalǵastyrý úshin QR Bilim jáne ǵylym mınıstriniń buıryǵyna sáıkes shetelden kelgen muǵalimderdiń bilimi týraly qujattardy taný (nostrıfıkatsııalaý) erejesi boıynsha saraptama júrgizilip, Ulttyq akkredıtteý ortalyǵy sheshim qabyldaıdy eken. Shetelden alǵan bilimniń mazmuny qazaqstandyq memlekettik jalpyǵa mindetti bilim standarttaryna sáıkestigi tekseriledi. Bul durys bolar. Alaıda, Mańǵystaý oblysynda osyndaı jaǵdaımen 100-ge jýyq muǵalim qujattaryn ótkizse de ol qujattar qabyldanbaǵan. Muǵalimderdiń ýájine qaraıtyn bolsaq, ol qujattardy tolyq jınastyrý múmkin emes», - dedi depýtat.

Onyń aıtýynsha, atalǵan muǵalimderdiń kópshiligi qajetti qujattardy jınaqtaý úshin kórshiles eldegi JOO arhıvin kótertip, tıisti anyqtama alý kerek, biraq oǵan múmkindik joq. Al ondaı anyqtama bolǵan kúnde de pánderdiń aıyrmashylyǵyn oqyp, emtıhan tapsyrý oblys ortalyǵynda emes Astanada ótkizilýi tıis eken. «Bul ustazdardyń bárin birdeı Astanaǵa kele almaıtyny taǵy ras. Osy sebepti bul ustazdar qazir jumyssyz otyr. Jaǵdaıdy zerdeleı kelsek, Ulttyq akkredıtteý ortalyǵynyń tıisti mamandary osy ustazdardyń pán aıyrmashylyqtary kýrstaryn Aqtaý qalasynda ótkizýleri kerek sekildi. Sondyqtan, ustazdardyń tıisti biliktilik talaptaryn belgilep, oqytyp, qajet bolsa qaıta daıarlap, emtıhan qabyldap, olarǵa tıisti qujattaryn Aqtaý qalasynan berý múmkinshilikterin qarastyrýyńyzdy suraımyn», - dedi depýtat.