Oralman mártebesin alýǵa qatysty advokattar tegin zań kómegin kórsetetin bolady

ASTANA. 20 aqpan. QazAqparat - Advokattar kórsetetin tegin zań kómegi - alıment óndirip alý, zeınetaqy jáne járdemaqy taǵaıyndaý, bosqyn nemese oralman mártebesin alý máseleleri boıynsha qoldanylady.

Budan basqa, ata-anasynyń qamqorlyǵynsyz qalǵan kámeletke tolmaǵandar, sondaı-aq Uly Otan soǵysy ardagerleri, I jáne II toptaǵy múgedekter, sondaı-aq is júrgizý zańnamasynda kózdelgen jaǵdaılar men tártipte ótinish bildirgen azamattarǵa advokattar kórsetetin tegin zań kómegi qoldanylady. Bul týraly búgin Parlament Májilisiniń spıker Nurlan Nyǵmatýlınniń tóraǵalyǵymen ótken otyrysynda «Memleket kepildik bergen zań kómegi týraly» zań jobasy jóninde baıandaǵan mınıstr Berik Imashev málim etti.

Mınıstrdiń aıtýynsha, advokattardyń memleket kepildik bergen zań kómegin kórsetý shegindegi olardyń eńbegine aqy tóleýdiń mólsheri men tártibin Úkimet aıqyndaıdy. «Bul sharalar tolyq kólemde bilikti zań kómegin alýǵa azamattardyń konstıtýtsııalyq quqyqtary men múddeleriniń qorǵalýyn, kórsetiletin quqyqtyq qyzmetterdiń sapasy men qoljetimdiligin arttyrýǵa septigin tıgizedi dep oılaımyn. Tegin zań kómegin kórsetý sheńberinde jeke notarıýstardan azamattardyń jekelegen áleýmettik-osal sanattary quqyqtyq sıpattaǵy qyzmetterge aqy tóleýden bosatylady. Al bularǵa Uly Otan soǵysyna qatysýshylar men olarǵa teńestirilgen adamdar, kóp balaly analar, sozylmaly júıke aýrýymen aýyratyn jeke adamdar jatady. Sondaı-aq osy sanatqa qarttar men múgedekter, jetim balalar, 1 jáne 2 toptardaǵy múgedekter men jas mólsheri boıynsha zeınetkerler kiredi», - deıdi Berik Imashev.