«Oralman» fılmi «Tulpar» kınojúldesiniń alty atalymy boıynsha jeńimpaz atandy
ASTANA. QazAqparat - «Oralman» kórkem fılmi ulttyq «Tulpar» kınojúldesiniń alty atalymy boıynsha jeńimpaz atandy, dep habarlaıdy QazAqparat «Qazaqfılm» kınostýdııasyna silteme jasap.
«Tulpar» júldesiniń marapattaý rásimi Almaty Film Festival kınofestıvaliniń jabylý saltanatynda ótti.
Ulttyq kınematografııa óneri men ǵylymdary akademııasynyń barlyq múshesi qatysqan jabyq daýys berý qorytyndysy boıynsha, «Oralman» kartınasy úzdik fılm bolyp tanyldy. Odan bólek, fılmniń rejısseri Sábıt Qurmanbekov úzdik rejısser, al basty róldi somdaǵan akter Dýlyǵa Aqmolda úzdik akter atandy. Sondaı-aq «Úzdik stsenarıı» atalymy boıynsha fılmniń stsenarıı avtorlary Nurlan Sanjar men Sábıt Qurmanbekov marapattaldy. «Úzdik sýretshi» júldesi fılmniń qoıýshy sýretshisi Rýstam Odınaevqa tabystalsa, «Úzdik kompozıtor» júldesi «Oralman» fılminiń mýzykasyn jazǵan Aıdos Saǵatovqa buıyrdy.
Al qalǵan júldeler rejısser Aqan Sataev túsirgen «Ona» fılmine tabystaldy. «Úzdik aktrısa» nomınatsııasynda Aısulý Ázimbaeva jeńiske jetse, «Úzdik operator» júldesimen Azamat Dýlatov marapattaldy.
Kınematografııa salasyndaǵy ulttyq «Tulpar» júldesin otandyq kınematografty qoldaý, mádenı erekshelikti jáne ulttyq kınoındýstrııa negizin saqtaý, jergilikti jáne halyqaralyq jurtshylyq arasynda qazaqstandyq úzdik jumystardy nasıhattaý maqsatynda qurylǵan bolatyn. Atalmysh júlde kınematografııanyń jáne otandyq kınonyń damýyna kórnekti úles qosqan jetistikteri úshin beriletin kásibı marapat bolyp tabylady.
Bıyl «Tulpar» júldesinde 2017 jyldyń 1 qazany men ústimizdegi jyldyń 30 qyrkúıegi aralyǵynda kórermen nazaryna usynylǵan nemese prokatqa shyǵýǵa josparlanǵan qazaqstandyq kórkem, derekti jáne anımatsııalyq fılmder irikteýden ótti.
Esterińizge sala ketsek, «Oralman» fılmi týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz jaıly baıandaıdy.
