«Oralman» fılmi Germanııadan júldeli oraldy
ASTANA. QazAqparat - 9-19 qarashada Germanııada ótken 66-shy halyqaralyq Mangeım-Haıdelberg (International Filmfestival Mannheim-Heidelberg) kınofestıvalinde «Oralman» fılmi úzdik jetistikteri úshin arnaıy júldemen marapattaldy, dep habarlaıdy QazAqparat «Qazaqfılm» kınostýdııasynyń baspasóz qyzmetine silteme jasap.
Odan bólek, kınofestıvaldiń uıymdastyrýshylary atalǵan kınotýyndyny Germanııada prokatqa shyǵarýǵa usynys jasady.
Esterińizge sala ketsek, «Qazaqfılm» kınostýdııasy túsirgen rejısseri Sábıt Qurmanbekovtiń «Oralman» fılmi atalǵan kınofestıvaldiń negizgi baǵdarlamasyna iriktelinip alynǵan bolatyn. Bıyl festıvaldiń bas júldesine 22 elden 21 kartına talasqa túsken.
«Mádenı jáne dinı ózgeshelikterine qaramastan, óz eline qaıta oralǵan otbasynyń dramalyq oqıǵasy emotsıonaldy áserli baıandalǵany úshin marapattalady», - delingen festıvaldiń resmı saıtynda.
Mangeım-Geıdelberg kınofestıvaliniń nátıjesi boıynsha, baıqaýdyń «Úzdik tolyqmetrajdy fılmi» atty bas júldesi rejısser Vıto Palmıerımniń «Tehasta kórisermiz» atty ıtalııalyq kartınaǵa buıyrdy. Al fılıppındik rejısser Bagane Fıol túsirgen «Ormandaǵy serýen» fılmi festıvaldiń arnaıy júldesimen marapattaldy. Sonymen qatar, «Kúzetshi» (Domınıkan Respýblıkasy, Pýerto-Rıko, Brazılııa), «Qasıetti aýa» ( Izraıl) jáne «Murtaza» (Túrkııa) atty fılmder qazylar alqasynyń qurmetti syılyqtarymen marapattaldy.
66-shy Halyqaralyq Mangeım-Haıdelberg (International Filmfestival Mannheim-Heidelberg) kınofestıvaliniń halyqaralyq qazylar alqasynyń quramyna Germanııanyń tanymal kınematografısteri - Klaýdıa Landsberger, Krıstıan ıÝl Lemche jáne Klemens Klopfenshteınder kirdi.
Esterińizge sala ketsek, «Oralman» kórkem fılmi osy jyldyń basynda Irannyń astanasy Tegeranda ótken 35-shi halyqaralyq Fadjr kınofestıvali men XIII Halyqaralyq «Eýrazııa» kınofestıvaliniń Bas júldesin jeńip alǵan bolatyn. Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy. Sondaı-aq, kartına Italııada ótken HH Halyqaralyq «Religion Today» kınofestıvalinde «Úzdik fılm» nomınatsııasynda jeńiske jetip, táýelsiz SIGNIS qazylar alqasynyń arnaıy júldesin ıemdendi.
Aıta ketelik, Bashqurtstanda ústimizdegi jyldyń jeltoqsanynda ótetin IV Halyqaralyq «Kúmis Aqbozat» kınofestıvaliniń ashylý saltanaty «Oralman» fılmimen ashylady.
