Oralǵa qonǵan ushaqta 17 jasar qyz kóz jumdy

Oral qalasyndaǵy M.Mámetova atyndaǵy halyqaralyq áýejaıǵa qonǵan ushaqta 17 jasar qyz kóz jumdy, dep habarlaıdy QazAqparat tilshisi.

TourDom.ru saıtynan alynǵan málimetke qaraǵanda, Turkish Airlines áýe kompanııasynyń ushaǵy Qazannan Antalııaǵa 17 qyrkúıek kúni jergilikti ýaqyt boıynsha saǵat 12.44-te ushqan.

Ushý kezinde 17 jasar múgedek qyzdyń júregi toqtap qalǵan. Osy reıspen kele jatqan eki dáriger qyzdyń júregine massaj jasap, jasandy demaldyrǵanymen, odan eshteńe shyqpady. 

Ushaq Oral qalasyna májbúrli túrde qondy.

«Oral» halyqaralyq áýejaıy» JShS baspasóz qyzmeti ushaqtyń 17 qyrkúıek kúni 16.01-de qonyp, 2,5 saǵattan keıin qaıta ushyp ketkenin habarlady.

BQO densaýlyq saqtaý basqarmasy baspasóz qyzmetiniń naqtylaýynsha, qyz jedel járdem kelgenshe ushaq bortynda qaıtys bolyp ketken. Brıgada saǵat 16.02-de shaqyrtylyp, 16.17-de jetken.

Ushaqta 3 dáriger bolǵan, olar 45 mınýt boıy qyzdy aman alyp qalýǵa tyrysqanymen odan eshteńe shyqpady.