Oralǵa qala kúnine oraı Tóreǵalı Tóreáli men Erke Esmahan kelmek
ORAL. QazAqparat - Oralda bıyl qala kúnine arnalǵan negizgi merekelik sharalar 2-10 qyrkúıek aralyǵyna josparlanyp otyr. Bul týraly óńirlik kommýnıkatsııalar qyzmetiniń alańynda Oral qalasy ákiminiń orynbasary Mırbolat Nurjanov málim etti, dep habarlaıdy «QazAqparat» tilshisi.
Onyń aıtýynsha, túrli baıqaýlarǵa qosa 2 qyrkúıek kúni Jaıyq ózeni jaǵalaýynda «Jaıyq sazy» dástúrli óner festıvali bolmaq. Kelesi kúni Saltanat saraıy janynda «Avtotıýnıng shoý» sharasy ótse, 4-10 qyrkúıekte otandyq fılmder kórsetilimi aptalyǵy bolmaq. 6 qyrkúıekte Qadyr Myrza Álı atyndaǵy mádenıet jáne óner ortalyǵynyń amfıteatrynda Oral qalasy ákiminiń kýbogyna arnalǵan KVN, kelesi kúni qalalyq mádenıet jáne demalys saıabaǵynda «Dombyra PARTY» festıvali ótedi. 
8 qyrkúıek kúni Oral qalasy ákiminiń kýbogy úshin voleıboldan «Dostyq-Drýjba» halyqaralyq týrnıri bastalyp, keshkisin P.Atoıan atyndaǵy stadıonda Qazaqstannyń estrada juldyzdary Tóreǵalı Tóreáli, Erke Esmahan jáne Son Paskaldyń qatysýymen kontserttik baǵdarlama qoıylady.
9-10 qyrkúıek kúnderi oblystyq qazaq drama teatrynda «Oral arýy - 2017» baıqaýynyń jeńimpaz-júldegerleri anyqtalyp, shaǵyn sáýlettik pishinder men músinder ashylady. Jaıyq ózenine bekire balyqtary jiberilip, aýyl sharýashylyǵy jármeńkesi ótkiziledi. Al qala kúnine arnalǵan retro-festıvalǵa Qaraqat Ábildına men Qydyráli Bolman qatysady.
