Oraldyń jańa shaǵynaýdanynda kópqabatty 150 úı, 8 mektep salynady
ORAL. QazAqparat - Oraldyń jańadan boı kóteretin «Aqjaıyq» shaǵynaýdanynda 150 kóp qabatty úı salý kózdelýde. Bul týraly búgin óńir basshysy Altaı Kólginovtiń tóraǵalyǵymen ótken oblys ortalyǵyn damytý máselelerine arnalǵan keńeste qala ákimi Murat Muqaev málim etti, dep habarlaıdy QazAqparat tilshisi.
Onyń aıtýynsha, jańa aýdan kólemi - 425 gektar. Onda turǵyn úılerge qosa 9 600 oryndyq 8 jalpy bilim beretin mektep, 9 balabaqsha, densaýlyq saqtaý nysandary men 78 balalar oıyn alańyn salý josparlanǵan.
Qala basshysynyń sózine qaraǵanda, qazirgi tańda jańa shaǵynaýdandy ınjenerlik jelilermen qamtý jumystary bastaldy. Onyń jalpy uzyndyǵy - 124,8 km. Jalpy somasy 4,2 mlrd teńge bolsa, bıyl sonyń 1,7 mlrd teńgesi bólindi. Osy qarjyǵa sýmen, elektr jelisimen, gazben jáne káriz júıesimen qamtý jumystary júrgiziletin bolady.
Sonymen qatar bıyl «Aqjaıyq» shaǵynaýdanyn qala ortalyǵymen baılanystyratyn kópirmen birge avtojol qurylysynyń jobalyq-smetalyq qujattamasy jasalady. Buǵan 127,890 mln teńge qajet bolsa, kúni búgin sonyń 30 mln teńgesi berildi. Qujattamany memlekettik vedomstvodan tys saraptamamen birge 2019 jyldyń ekinshi toqsanynda bitirý kózdelýde. Al joba «QPO b.v.» kompanııasy qarjysy esebinen 2019-2022 jyldary júzege asyrylmaqshy.
Aıta keteıik, bıyl qala qurylysynyń jumystaryna 13 mlrd teńge bólinse, sonyń 80 paıyzy (10 mlrd teńge) turǵyn úı salýǵa, 14 paıyzy (1820 mln teńge) ınjenerlik ınfraqurylymdy damytýǵa baǵyttalǵan. 2017 jyly bastalǵan 5 kóp qabatty turǵyn úı qurylysy jalǵasady. Oǵan qosa «Nurly jer» baǵdarlamasy aıasynda 2 turǵyn úıdiń qurylysy bastalyp, 14-iniń jobalyq-smetalyq qujattamasy jasaldy.
Bıyl barlyǵy 159,1 myń sharshy metrdi quraıtyn 21 úıdiń (3 242 páter) qurylysy bastalady.
Elbasy tapsyrmasyna sáıkes barlyq baǵdarlamalar boıynsha («Nurly jer», memlekettik-jekeshelik áriptestik jáne t.b.) 2018 jyly Oralda 35 kóp qabatty úıdiń (4 742 páter) qurylysy júrgiziledi.
