Oraldyń «túngi soty» 20 kúnniń ishinde 62 isti qarady
ORAL. QazAqparat - Oral qalasynyń mamandandyrylǵan ákimshilik soty «Túngi sot» pılottyq jobasy aıasynda 20 kúnniń ishinde 62 ákimshilik isti qarady, dep habarlaıdy QazAqparat tilshisi.
Batys Qazaqstan oblystyq sotynyń baspasóz qyzmetinen túsken málimetke qaraǵanda, sonyń ishinde 38 is jol-kólik oqıǵalary boıynsha qaraldy.
Sondaı-aq 15-i otbasylyq-turmystyq qatynastar salasyna, altaýy usaq buzaqylyqqa qatysty. 2 is ishki ister organy shyǵarǵan qorǵaý nusqamasyn oryndamaý týraly, 1 is kólik quralyn basqarý, taǵy bireýi kólik quralyn mas adamnyń basqarýyna berý týraly.
Sot tek bir kúnniń ishinde saǵat 18.00-den 22.00-ge deıin 12 iske núkte qoıdy. Qalǵan kúnderi sotqa orta eseppen 3-6 isten tústi.
Sot ákimshilik quqyqbuzýshylyqtar týraly isterdi qaraý kezinde medıatsııa rásimin keńinen qoldandy. Mysaly, otbasylyq kıkiljińge qatysty 9 is tatýlasý týraly kelisimge kelýmen aıaqtaldy.
«Túngi sot», ásirese, jol erejesin buzýshylyqqa baılanysty júgingen azamattarǵa qolaıly bolyp otyr. Bul qysqa merzim ishinde isti tyndyryp, búlingen avtokólik úshin saqtandyrý tólemin alýǵa múmkindik beredi.
Osyǵan deıin Batys Qazaqstan oblysynda qar qursaýynan 80-ge jýyq avtokóliktiń shyǵarylǵandyǵyn jazdyq.
