Oraldyń «Qazaq halqyna myń alǵys» monýmentinde merekelik shara ótti
Búgin tańerteń qala jurtshylyǵy «Qazaq halqyna myń alǵys» monýmenti janyna jınaldy.
Mıtıngide sóz alǵan oblys ákiminiń orynbasary Ǵabıdolla Ospanqulov qazaq halqynyń áýelden óz salt-dástúri men mádenıetin damytýmen birge ózge ulttarǵa degen meıirbandylyǵy erekshe bolǵandyǵyn jetkizdi.
«Ótken ǵasyrdyń jıyrmasynshy jáne otyzynshy jyldary qazaq dalasyna basqa jerlerden deportatsııalanǵan túrli ult ókilderiniń kelip, qonystanǵany belgili. Mine, qazaq halqy solardyń bárine sýyn berip, nanyn bólisti. Búginde Elbasymyzdyń salıqaly saıasaty arqasynda Qazaqstanda 130-dan astam ult ókilderi tatý-tátti ómir súrip, eńbek etýde. Osyǵan oraı Alǵys aıtý kúnin atap ótýdiń tereń fılosofııalyq máni bar. Sondyqtan bir-birimizge aıtar alǵysymyz taýsylmasyn, birligimiz myǵym, bolashaǵymyz jarqyn bolsyn!», - dedi Ǵabıdolla Abdollauly.
Jıynda sondaı-aq, «Vaınah» sheshen-ıngýsh jáne káris etnomádenı birlestikteriniń tóraǵalary Danılbek Saratov pen Maksım Pak osy ult ókilderin kezinde qazaq halqy qushaq jaıa qabyldap, baýyryna basqanyn aıtyp, sol úshin rızashylyqtary sheksiz ekendikterin jetkizdi.
