Oraldyń «Gratsııa-KZ» komandasy halyqaralyq týrnırde jeńimpaz atandy
ORAL. QazAqparat - Oraldyń «Gratsııa-KZ» komandasy Ońtústik Qazaqstan oblysy «Saryaǵash» kýrorttyq kesheni aýmaǵyndaǵy «Aqbulaq» shıpajaıynda 2002-2003 jylǵy qyzdar arasynda voleıboldan ótken halyqaralyq týrnırde jeńimpaz atandy, dep habarlaıdy «QazAqparat» HAA tilshisi.
Komandanyń bas bapkeri Kóleńke Ǵubashevtiń aıtýynsha, atalmysh jarysqa Horezm, Ferǵana (Ózbekstan), Osh (Qyrǵyzstan), Óskemen, Taldyqorǵan, Shymkent, Oral jáne Saryaǵashtan komandalar qatysyp, baq synady.
Tórt komanda iriktelip shyqqan fınalda oraldyqtar «Jetisýǵa» (Taldyqorǵan) ǵana 2:3 esebimen ese jiberdi. Degenmen budan qorytyndy shyǵara bilgen «Gratsııa-KZ» komandasy Óskemenniń «Altaıyn», sońǵy kúni alań ıelerin 3:0 esebimen tize búktirdi, sóıtip týrnır kýbogyn ıelendi. «Batysqazaqstandyqtar dop berýde jıi qatelesip, bizden jeńilip qalǵanymen, týrnırdiń úzdik komandasy ekendigin dáleldeı bildi. Bizder ońtústikqazaqstandyqtardan utylǵannan keıin «Gratsııa-KZ» alań ıelerin jeńse, jarys jeńimpazy atanatyn edi. Olar sheber oıyn órnegin kórsetip, bul múmkindikterin tolyǵymen paıdalana bildi. Jalpy, osyǵan deıin Qazaqstan ulttyq quramasyna Sana Jarlyǵasova (qazir Anarqulova), Zarına Sıtqazynova, Aınagúl Aıjaryqova syndy oıynshylardy daıyndaı bilgen oraldyq komandadan budan keıin de el namysyn qorǵaıtyn myqty voleıbolshylar shyǵatynyna senemin», dedi «Jetisý» komandasynyń bapkeri, sport sheberi Ekaterına Zarechnaıa.
Aıta keteıik, jýyrda «Gratsııa-KZ» komandasy voleıboldan 2005-2006 jylǵy qyzdar arasynda Bashqurtstan astanasy Ýfa qalasynda ótken halyqaralyq týrnırde kúmis júldeger atanǵan bolatyn.
