Oraldyń fýtbol komandasy Aqtóbede ótken týrnırde jeńimpaz atandy
ORAL. QazAqparat - Aqtóbe qalasynda Jeńis kúnine oraı 2009 jylǵy balalar arasynda ótken respýblıkalyq týrnırde Oraldan barǵan «Fýtbol Kıds Ýralsk» komandasy jeńimpaz atandy, dep habarlaıdy «QazAqparat» tilshisi.
8 mamyr kúni bastalyp, búgin márege jetken jarysqa barlyǵy jeti komanda qatysyp, olar eki topqa bólinip, kúsh synasty. Oraldyqtar (bas bapkeri Bolat Shalaev, klýb jetekshisi Bolat Sarıev) toptyq básekede «Sevılıany» 5:1, «Interdi» 4:2 jáne «Aqtóbe» fýtbol klýbynyń 2009 jylǵy quramasyn 3:2 esebimen utty. Jartylaı fınalda «Rýbındi» 4:0 esebimen oısyrata jeńdi. Al fınalda alań ıeleri - olımpıadalyq rezervtegi Aqtóbe oblystyq balalar men jasóspirimder mektebiniń komandasyn 2:1 esebimen tize búktirdi. Komanda quramynda Jahanger Alǵazıev, Dııarhan Qarabalınov, Taıyr Baıqatov, Nurdáýlet Shernııaz, Mansur Ibrashev, Narul Ǵaısaǵalı, Alan Imash, Arystan Ábilǵazıev, Ábilmansur Bısen, Oljas Sábıt oınady. Osylardyń ishinen A.Ábilǵazıev týrnırdiń úzdik oıynshysy atandy. Al N.Shernııaz komanda úzdigi bolyp tanyldy.
«Baldyrǵandardy jattyqtyrýdan tájirıbem joq emes. Bala kezinde Oral fýtbolynyń jaryq juldyzy Nurbol Jumasqalıevti de baptap edim. Biraq segiz jasar balalardy mundaı jarysqa birinshi ret apardym. Olar biz oılaǵan mejeden asyp túsip, sheberlikke qosa tabandylyq pen qaısarlyq tanyta bildi. Balalaryna qoldaý kórsetken ata-analaryna da alǵysymdy aıtamyn», dedi Bolat Shalaev.
