Oraldyń «Aqjaıyǵy» óz alańynda «Qaıratty» utty
ORAL. Qyrkúıektiń 13-i. QazAqparat /Eljan Eraly/ - Qyrkúıektiń 11-inde fýtboldan QR chempıonaty premer-lıgasynyń kezekti týrynda Oraldyń «Aqjaıyǵy» óz alańynda Almatynyń «Qaıratyn» qabyldady, dep habarlaıdy QazAqparat tilshisi.
Oıynnyń birinshi kezeńinde almatylyqtar shıraǵyraq qabyldady. Qonaqtar ózderiniń jartylaı qorǵaýshysy Shyńǵys Ábýǵalıevti eki márte ońtaıly tusqa shyǵara bildi, biraq ol sol múmkindikti paıdalana almady.
Ekinshi taımda «Aqjaıyqtyń» quramynda Sergeı Shevtsovtyń ornyna kópti kórgen tájirıbeli oıynshy Artýr Avakıants shyqty. Alaıda «Qaırat» shabýylyn toqtatqan joq. 51-mınýt oıynnyń sheshýshi sáti boldy. Oraldyqtar óz aıyp alańynda Andreı Bogomolovty shalyp jyǵyp, «Aqjaıyqtyń» qaqpasyna 11 metrlik belgilendi. Sol núkteden Shyńǵys Ábýǵalıevtiń soqqan dobyn ekinshi aınalymda «Aqjaıyqqa» alynǵan oıynshynyń biri, horvattyq qaqpashy Ivan Grabovats qaıtara bildi. Osyǵan jigerlengen alań ıeleri alǵa qaraı umtyldy. Onyń ústine komanda kapıtany Aıbek Ǵubaıdýllınniń ornyna Moldova quramasynyń múshesi Vıktor Komlenok shyǵyp, oıyn tizginin óz qolyna aldy. 60-mınýtta sol qaptaldan sýyryla shyqqan «Aqjaıyqtyń» surmergeni, ganalyq Mozes Sakı dopty Komlenokqa qolmen qoıǵandaı syrǵyta saldy. Vıktor da qaqpany dál kózdedi. Al 62-mınýtta Mozes Sakı qonaqtardyń esin jıǵyzbastan, endi oń qaptaldan oıqastap, qonaqtardyń qorǵaýshylary men qaqpashysyn qapy qaldyrdy.
Sóıtip «Aqjaıyq» 2:0 esebimen jeńiske jetti. Osy oıynnan keıin «Aqjaıyq» pen «Qaırattyń» upaıy teńesti. Eki komanda da 20 upaıdan jınap, dop aıyrmasymen «Aqjaıyq» onynshy orynǵa kóterildi. Oraldyqtar kelesi oıynyn toǵyzynshy oryndaǵy «Tarazben» syrt alańda kúsh synasady.
Oıynnan keıingi baspasóz máslıhatynda «Qaırattyń» bas bapkeri Sergeı Volgın on bir metrlik aıyp dobynyń soǵylmaýy alań ıelerine kúsh qosqanyn, sondaı-aq on bes-aq mınýtqa shyqqan Vıktor Komlenoktyń jeńiske qosqan úlesin erekshe atap ótti. «Aqjaıyqtyń» bas bapkeri Andreı Chernyshov birinshi taımda alań ıeleriniń aıaǵyna tusaý túskendeı, kibirtiktep qalǵanyn, esesine ekinshi kezeńde óz múmkindikterin tolyq paıdalanǵanyn aıtty. Moldova ulttyq quramasyna shaqyrtylyp, sondaǵy jattyǵý kezinde jaraqat alǵan V.Komlenok soǵan qaramastan, oıynǵa qosylyp, úmitti aqtady. Keıin ol jaraqaty qaıta syr berip, ózin almastyrýyn surady. Biraq bul kezde is bitip, jeńis «Aqjaıyqtyń» paıdasyna sheshilip te qalǵan edi.
