Oraldyqtar dárigerge onlaın jazylyp, úıge shaqyra alady

ORAL. QazAqparat - Batys Qazaqstan oblysynda 23 medıtsına mekemesi qaǵazsyz jumys jasaýǵa kóshti. Bul týraly oblys ákimi Altaı Kólginov oblystyq klınıkalyq aýrýhanasynyń jumysymen tanysqan kezde aıtyldy, dep habarlaıdy QazAqparat tilshisi.

Oblystyq densaýlyq saqtaý basqarmasynyń basshysy Qanat Tósekbaevtyń aıtýynsha, Elbasy tapsyrmasyna sáıkes salada tsıfrlandyrý júıesi engizilýde. Bul turǵyndarǵa medıtsınalyq qyzmet sapasyn arttyryp, dárigerlerdiń jumysyn jeńildetýge áser etýde. Emdelýshi týraly barlyq málimet ortaq bazada turǵandyqtan, kez kelgen derekti qajet bolǵan kezde taba alady. Birinshi jartyjyldyqtyń aıaǵyna qaraı óńirde densaýlyq saqtaý salasynda tsıfrlandyrýdy tolyq bitirý kózdelýde. Qazir bul jóninen BQO elimizde alda keledi. Jýyrda mobıldi qosymsha iske qosylyp, medıtsınalyq kómektiń ashyqtyǵy men qoljetimdiligin qamtamasyz etýge baǵyttalmaq. Sondaı-aq turǵyndar  elektrondy qujaty arqyly dárigerge onlaın jazylyp, qajet bolsa, úıge shaqyra alady.

Qazirgi ýaqytta oblystyq aýrýhananyń qabyldaý bólimshesi de trıaj júıesi boıynsha jumys jasaýda. Munda kelgen adamnyń jeke kýáligi arqyly bazadaǵy málimetterden onyń barlyq deregi kórinip turady. Munyń bári naýqasqa shuǵyl medıtsınalyq kómek kórsetýge múmkindik beredi.

Aýrýhananyń sáýlelik dıagnostıka bólimshesiniń meńgerýshisi, bilikti dáriger Asylbek Baqaev óńir basshysyna magnıttik-rezonanstyq tomografııa apparatynyń 2007 jyly alynǵandyǵyn, sondyqtan ábden tozǵandyǵyn jetkizdi. Osylaısha batysqazaqstandyq turǵyndar ózge qalalarda tekserilýge májbúr bolýda. Oblys ákimi bul rette jańa apparattyń memlekettik-jekeshelik áriptestik aıasynda aldaǵy shilde aıynda alynatynyn atap ótti.

Oblystyq aýrýhana dırektory Arman Baıdeýovtiń sózine qaraǵanda, sondaı-aq lızıngke oftalmologııalyq ÝZI, lıtotrıpter (ýrologııalyq aýrýlar) apparattary satyp alynbaqshy.