Oraldyq jekpe-jek sheberi Aqtaýda ótken halyqaralyq jarysta jeńimpaz atandy
ORAL. QazAqparat - Aqtaý qalasynda NFC-9 (Naiza Fighting Championchip) erejesiz kásibı urysynan ótken 9-ynshy halyqaralyq týrnırde batysqazaqstandyq Temirlan Ihsanǵalıev jeńimpaz atandy, dep habarlaıdy «QazAqparat» tilshisi.
Atalmysh jarysqa Qazaqstan men Reseıden 20 sportshy qatysty. Qazaqstannan Aqtóbe, Atyraý, Aqtaý jáne Oral qalasynyń jekpe-jek sheberleri baq synady. Barlyǵy 20 urys bolsa, sonyń ekeýi 84 kelige deıingi salmaqtaǵy NFC WEST fınaldyq básekesi edi. Eń basty urys batysqazaqstandyq Temirlan Ihsanǵalıev pen Sheshenstan eliniń ókili Rýstam Alıevtiń arasynda ótti.
«Naiza Fighter» klýbynyń jetekshisi Nurbek Qarabalaevtyń aıtýynsha, 20 urystyń tórteýinde qazaqstandyq pen reseılik sportshylar ózara synǵa tústi. Sonyń úsheýinde qazaqstandyqtar jeńilis tapsa, Temirlan Ihsanǵalıev qarsylasyn aıqyn basymdylyqpen utty.
Jarysty Mańǵystaý oblysynyń ákimi Eraly Toǵjanov tamashalap, T.Ihsanǵalıevke júldesin tabys etti.
Aıta keteıik, Temirlannyń qarsylasy osal bolǵan joq. T.Ihsanǵalıevten úsh jas úlkendigi bar, 34 jasar Rýstam Alıev - kıkboksıngten Eýropa chempıony, tájirıbeli sportshy. Al qoıan-qoltyq urystan halyqaralyq jarystarda atoı salyp, júlde alyp júrgen Temirlan Ihsanǵalıev 2015 jyly áskerı sambodan álem birinshiliginiń kúmis júldegeri atanǵan bolatyn.
