Oraldyq jaýynger «Jyl patrıoty» atandy
ORAL. QazAqparat - Búgin Astanada ótken Qazaqstan patrıottary forýmynda batysqazaqstandyq Qýanysh Saılaýov ta marapattaldy, dep habarlaıdy «QazAqparat» tilshisi.
QR Ulttyq ulany «Batys» óńirlik qolbasshylyǵyna qarasty 5517-áskerı bólim qyzmetkeri, qatardaǵy jaýynger Qýanysh Saılaýov «Týǵan jerim - ǵumyrym» atalymy boıynsha jyl patrıoty atandy.
Áskerı bólimde 2014 jyldan beri qyzmet etetin Qýanysh Saılaýov bıylǵy 10 mamyrda erligimen kózge túsken-di. Sol kúni betperde kıip, mototsıkl mingen qarýly eki adam Aleksandr Fedın degen azamatqa shabýyl jasap, qomaqty aqshasy bar sómkesin tartyp almaq bolady. Osy kezde dúkende júrgen Qýanysh aıqaı-shýdy estip, syrtqa júgirip shyǵyp, Aleksandrmen birge kisi tonaýshylarǵa toıtarys beredi. Qaraqshylardyń oıy iske aspaı, qashyp ketedi.
Qýanysh Qanatulynyń batyl áreketi týraly Aleksandr Fedınniń polk komandıriniń atyna alǵys aıtyp, jazǵan hatynan keıin belgili bolady.
«Men muny erlik dep sanamaımyn. Ulttyq ulannyń barlyq jaýyngeri azamattarǵa kómek kórsetýi kerek dep bilemin. Sebebi bul - bizdiń tikeleı mindetimiz. Sol oqıǵadan keıin meni Astana tórine aldyrtyp, tańdaýly azamattarmen qatar marapattaıdy dep oılamap edim. Meniń qyzmetime oń baǵa bergen Ulttyq ulan basshylyǵyna, «Batys» óńirlik qolbasshysy, general-maıor Álibek Serálıevke alǵysymdy bildiremin, - dedi Qýanysh Saılaýov.
