Oraldyq turǵynnyń úı alamyn dep jınaǵan 5 mln teńgesi qoldy boldy
ORAL. QazAqparat – Oraldyq turǵynnyń úı alamyn dep jınaǵan 5 mln-ǵa jýyq teńgesi qoldy boldy, dep habarlaıdy QazAqparat tilshisi.
Oral qalasy polıtsııa basqarmasy málim etkenindeı, oqıǵa 12 qazan kúni Zachagan kentinde boldy.
Kúndizgi saǵat 11.00 men 14.30 aralyǵynda Tumar hanym kóshesi boıyndaǵy jeke úıden 5 mln-ǵa jýyq teńge urlandy.
Ury úıde eshkim joǵyn baıqap, esiktiń qulpyn syndyryp ashyp, ishke emin-erkin kirgen. Úı ıesiniń páter alamyn dep jınaǵan aqshasyn jymqyryp, boı tasalaǵan.
Shaǵan polıtsııa bóliminiń qyzmetkerleri júrgizgen jedel izdestirý sharalary barysynda Aqjaıyq aýdanynyń esh jerde jumys jasamaıtyn 24 jastaǵy turǵyny 10 saǵat ishinde qolǵa tústi. Ol urlyq jasaǵanyn moıyndady. Qarjy úı ıesine qaıtaryldy. Sondaı-aq qoldy bolǵan korpýsy qońyr tústi «Nokııa» markaly uıaly telefon da tárkilendi.
Aqshasy qaıta qolyna tıgen 55 jastaǵy áıel qylmystyń izin sýytpaı ashqan polıtsııa qyzmetkerlerine alǵysyn bildirdi.
Kúdikti Oral qalasy polıtsııa basqarmasynyń ýaqytsha oqshaýlaý ızolıatoryna qamalyp, QR QK 188-baby 3-bóligine sáıkes qylmystyq is qozǵaldy.
Qazirgi kezde tergeý amaldary júrgizilýde.
Shaǵan polıtsııa bólimi boıynsha bıylǵy toǵyz aıda 22 páter urlyǵy (ótken jyly osy merzimde – 48) tirkeldi.
Eske sala keteıik, budan buryn Oralda qarjy pıramıdasy arqyly 68 mln teńge jymqyrǵan áıeldiń isin sot qarap jatqanyn jazǵan bolatynbyz.
