Oraldyq turǵyndy óltirgen kúzet qyzmetkerleri uzaq merzimge sottaldy

ORAL. QazAqparat – Batys Qazaqstan oblystyq qylmystyq ister jónindegi mamandandyrylǵan aýdanaralyq sotynda oraldyq turǵyndy óltirgen A.Ádilov, A.Qafızov jáne Á.Qonysqalıǵa qatysty úkim shyǵaryldy, dep habarlaıdy QazAqparat tilshisi.

Atalmysh sottyń baspasóz qyzmeti málim etkenindeı, A.Ádilov pen A.Qafızov QR QK 99-baby 2-bóligi (kisi óltirý) jáne 252-baby 2-bóligine (ýákilettiligin asyra paıdalaný) sáıkes aıypty dep tanyldy.

A.Ádilov 17, A.Qafızov 18 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.

Á.Qonysqalıǵa ýákilettiligin asyra paıdalanǵany úshin 2 jyl 6 aı merzimge bas bostandyǵynan aıyrý jazasy belgilendi.

Sot talqysynda anyqtalǵanyndaı, 2019 jylǵy jeltoqsan aıynyń 24-inen 25-ine qaraǵan túni kúzet agenttiginiń qyzmetkerleri Ádilov, Qafızov jáne Qonysqalı jumysta araq ishken.

Saǵat 03.30 shamasynda olar shaqyrtý boıynsha ýaqytsha beıimdeý jáne ýytsyzdandyrý ortalyǵyna kelip, sonda medıtsınalyq kýálandyrýdan ótkizýge jetkizilgen jábirlenýshi Q.Ahmetovti kórgen.

A.Qafızov baspaldaqtyń temir jaqtaýynan ustap, ǵımarattan shyǵýdan bas tartqan Q.Ahmetovtiń qolynan tartqan. Sol kezde Á.Qonysqalı men A.Qafızov jábirlenýshiniń betine soqqylar jumsaǵan. Sodan keıin Q.Ahmetovtiń moınynan qysyp ustap, mekeme aýmaǵynan kúshtep shyǵaryp, A.Qafızov taǵy da uryp-soqqan. Kóshe boıymen qashqan jábirlenýshini A.Qafızov pen A.Ádilov qýyp jetip, aıaǵynan shalyp qulatqan. Ekeýi bas tusynan birneshe ret urǵan. Kóılegi men maıkasy jyrtylyp, taıaq jegen Q.Ahmetov bas saýǵalap, janar-jaǵar maı quıý beketine qashyp baryp, kómek suraǵan, alaıda eshkim esik ashpaǵan. Sodan bekettiń artyna qaraı júgirip, proflısten jasalǵan qorshaýdan sekirip ótkisi kelgen. Eki qolymen, kıimsiz ótkir qorshaýǵa ilinip turǵan jábirlenýshiniń aıaǵynan A.Ádilov, belinen A.Qafızov ustap, kúshpen tartqan. Denesi proflısqa kesilip, qan shapqylap, shyńǵyryp aıqaılaǵanyna qaramastan, jábirlenýshini jerge qulatyp, uryp-soǵýlaryn jalǵastyrǵan. Marqum esin jımastan, aýyr dene jaraqattary saldarynan oqıǵa ornynda jan tapsyrǵan.

Sottalýshylardyń kinálary kýálardyń jaýaptarymen, oqıǵa ornyn teksergendegi hattamalarmen, sot-medıtsınalyq, bıologııalyq, medıtsınalyq-krımınalıstıkalyq saraptama qorytyndylarymen, beınekamera jazbalarymen tolyq dáleldendi.

Olardyń qylmysty mas kúıinde jasaýy aýyrlatatyn mán-jaı retinde tanyldy.

Sot úkimi kúshine engen joq.

Eske sala keteıik, budan buryn oraldyq áıeldiń 6-qabattan sekirmek bolǵanyn jazǵan edik.