Oraldyq turǵyn iri kólemdegi esirtkini avtokólikke aıyrbastaǵan
ORAL. QazAqparat - Oralda iri kólemdegi esirtkini avtokólikke aıyrbastaǵan turǵyn sottaldy, dep habarlaıdy QazAqparat tilshisi.
BQO qylmystyq ister jónindegi mamandandyrylǵan aýdanaralyq sottan túsken málimetke qaraǵanda, Asqar Muhanbetov asa iri kólemdegi esirtkini zańsyz saqtap, satqan.
Atap aıtqanda, ol 53 sirińke qoraby men 28 gazet oramasyna salynǵan 1 kg 725,93 gramm keptirilgen marıhýanany S.Esqalıev kóshesi boıyndaǵy ózi turatyn 148-úıdiń 60-páterinde zańsyz saqtaǵan.
Sodan 11 qańtar kúni saǵat 17.50 shamasynda marıhýananyń bir sirińke qorabyn (salmaǵy 1,33 gramm) úıinde qaldyryp, qalǵanyn (1 kg 724,60 gramm) qol sómkege salyp, avtokólikke aıyrbastaý úshin Dostyq dańǵyly boıyndaǵy «Saıahat» aıaldamasyna kelgen. Aıaldamanyń artynda búrkenshik «Lıder» esimdi turǵynmen kezdesip, oǵan qol sómkeni berip, ornyna «Toıota Kamrı» avtokóligin alǵan. Alaıda sol boıda qolǵa túsken. Avtokóliktiń «ıesi» retinde UQK qyzmetkeri bolǵan.
Sot úkimimen A.Muhanbetov QR QK 297-baby 3-bóligine sáıkes (asa iri kólemde esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) aıypty dep tanyldy. Ol 10 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteýge sottaldy.
Sot úkimi zańdy kúshine engen joq.
