Oraldyq turǵyn 2 keli marıhýanany páterinde saqtaǵan
ORAL. QazAqparat - Oraldyq 41 jasar turǵyn 2 keli marıhýanany páterinde saqtaǵan, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, atalǵan kúdikti «Kóknár-2019» jedel aldyn alý sharasy barysynda qolǵa túsken.
Turǵynnyń páterinen arnaıy paketterge salynǵan 1 kg 951 gramm marıhýana tabylǵan.
Qazirgi kezde QR QK 296-baby 4-bóligine sáıkes (esirtki zattaryn zańsyz saqtaý) qylmystyq is qozǵalyp, tergeý amaldary júrgizilýde.
Aıta keteıik, «Kóknár-2019» sharasy elimizde 1 maýsymda bastaldy. Sodan bergi bir aı ishinde óńirde esirtki zattarynyń zańsyz aınalymyna qatysty 23 qylmystyq jáne 15 ákimshilik quqyqbuzýshylyq anyqtaldy.
