Oraldyq stýdentter Almatyda ótken respýblıkalyq olımpıadadan tabyspen oraldy
ORAL. QazAqparat - M.Ótemisov atyndaǵy Batys Qazaqstan memlekettik ýnıversıtetiniń stýdentteri ál-Farabı atyndaǵy Qazaq ulttyq ýnıversıtetinde fılologııa mamandyǵy boıynsha qazaq tili men ádebıeti páninen ótken respýblıkalyq pándik olımpıadadan tabyspen oraldy, dep habarlaıdy «QazAqparat» HAA tilshisi.
Stýdentterdi bastap barǵan M.Ótemisov atyndaǵy BQMÝ-diń qaýymdastyrylǵan professory, fılologııa ǵylymdarynyń kandıdaty Rıta Sultanǵalıevanyń aıtýynsha, bilim jarysynda on eki komanda quramynda 36 stýdent baq synady. Olımpıada tórt týrdan turdy. Alǵashqy bólimde komanda mamandyqty tanystyrdy. Tańdalǵan taqyryp boıynsha aýyzsha tildik jáne ádebı taldaý jasaý jáne tańdalǵan taqyryp boıynsha eese jazý jáne ǵylymı joba jasap, qorǵaý boıynsha synǵa tústi.
Mamandyqty tanystyrý boıynsha mamandyq týraly aqparattyń tolyqtyǵy, júıeliligi, sóıleý ádebi men máneri eskerildi. Mysaly, morfologııalyq taldaý boıynsha qurylymdyq, satyly, fýnktsıonaldyq ustanym boıynsha taldaý, onyń ishinde uǵymdyq kategorııalardy anyqtaý, til deńgeıleriniń «formadan mazmunǵa» baǵytyndaǵy árekettestigin sıpattaý boıynsha talap qoıyldy. Ádebıettik taldaýda proza men poezııa janrlaryndaǵy shyǵarmalardan úzindiler berilip, birden taldaý talaby qoıyldy.
Úzindi avtoryn, shyǵarmanyń atyn, sýrettelip otyrǵan keıipkerdi tabý, shyǵarmanyń taqyryby men ıdeıasyn anyqtaý, avtordyń ómirbaıany men shyǵarmashylyǵyn sıpattaý boıynsha taldaý jumystary tartysty ótti.
M.Ótemisov atyndaǵy BQMÝ komandasynda Aqjol Zaınýllın (top basshysy), Sandýǵash Saǵıdýllıeva jáne Araılym Ǵanı synǵa túsip, bilim báıgesinde ýnıversıtet namysyn abyroımen qorǵady. Stýdent qyzdar tildik taldaý boıynsha, Aqjol Zaınýllın ádebıet boıynsha bilimderiniń tereń ekendigin kórsetti.
«Respýblıkalyq olımpıadaǵa birneshe ret jetekshilik jasap, baryp júrmin. Jyl saıyn ár qalada, túrli joǵary oqý oryndarynda ótip keledi. Bıylǵy jyly Almaty qalasynda ál-Farabı atyndaǵy QazUÝ-da ótti. Ózim sol bilim men ǵylym ordasynda kandıdattyq dıssertatsııamdy qorǵap, ǵylymı ortasyn kórip, ǵalymdardyń tálimin alǵandyqtan, men úshin ystyq shańyraq. Bilim báıgesinde óziń shákirt bop ketken ortada óz shákirtterińniń top jaryp, oza shabýy ustaz úshin de úlken baqyt, bedel men abyroı. Olımpıada qorytyndysy boıynsha M.Ótemisov atyndaǵy Batys Qazaqstan memlekettik ýnıversıtetiniń komandasy ál-Farabı atyndaǵy QazUÝ-dyń І dárejeli, QR Bilim jáne ǵylym mınıstrliginiń ІІ dárejeli dıplomymen marapattaldy», dedi «QazAqparat» tilshisine R.Sultanǵalıeva.
