Oraldyq rejısserdiń fılmi Nıý-Iork kınofestıvalinde kórsetilmek
ORAL. QazAqparat - Oraldyq jas rejısser Maksım Qodarovtyń «Kýb» atty qysqa metrajdy fılmi V Nıý-Iork Eýrazııa kınofestıvalinde kórsetilmek, dep habarlaıdy «QazAqparat» tilshisi.
Sondaı-aq sheteldik kórermender nazaryna Aqan Sataevtyń «Anaǵa aparar jol», Ádilhan Erjanovtyń «Qaratas aýylyndaǵy oba» jáne Ratmır Nazarovtyń «Páter jaldaýshy qyz» atty kartınalary usynylmaq. Fılmderdiń kórsetilimderi 16-18 maýsym aralyǵynda Nıý-Iorktegi Maroney & Founder's Hall teatrynda ótedi.
2010 jyly Nıý-Iork táýelsiz rejısserlar uıymynyń bastamasymen ashylǵan atalmysh festıvalǵa orta eseppen álemniń jıyrma elinen seksennen astam kartınany kórsetý jóninde ótinish jasalady eken.
Óziniń otbasy, anasy Oralda turǵanymen, sońǵy birer jyldan beri kıno túsirý maqsatynda Almatyda júrgen Maksım Qodarovtyń aıtýynsha, «Kýb» fılmi «Jeti ata» kompanııasynyń basshysy Rýslan Tilemisovtiń qoldaýymen 2016 jyly shyǵarylǵan. Sondaı-aq ekinshi prodıýser Saıyn Ǵabdýllınniń de eńbegi mol. Qysqa metrajdy fılmde oınaıtyn Janat Nábıeva men Ramazan Kópbaev kásibı akterler emes. Kezinde Oraldaǵy Sáken Ǵumarov atyndaǵy balalar kórkem sýret mektebin bitirgen Maksım Qodarovqa fılm stsenarııin jazýǵa sýretshilik óneri septesken kórinedi. Nebári on toǵyz mınýtqa sozylatyn týyndyǵa mýzykalyq mektepte eden jýýshy qyzmetin atqaratyn elý jas shamasyndaǵy skrıpkashy áıeldiń taǵdyry, onyń oryndalmaǵan armandary arqaý bolǵan.
«Shyǵarmashylyq baǵytta budan keıin de jumystanbaqshymyn. Mıstıka elementteri aralasqan «Joǵalǵan adam» atty taǵy bir qysqa metrajdy fılmdi bitirdim. Bolashaqta qazirgi qoǵamǵa qatysty kókeıkesti taqyrypta kólemdi kartına túsirýdi qolǵa alsam deımin», dedi Maksım Qodarov.
