Oraldyq oqýshynyń jobasy tájirıbelik saraptaýdan ótýde

Oral qalasyndaǵy Nazarbaev zııatkerlik mektebiniń baspasóz hatshysy Aqmonshaq Jumaevanyń aıtýynsha, Qýanyshtyń jobasy jýyrda Astanada ótken ınnovatsııalyq jobalardyń ulttyq olımpıadasynda úzdik ondyqtyń qataryna endi.

Atalmysh sharany «Qazaqstan - 2050» jalpyulttyq qozǵalysy «Samuryq-Qazyna» ulttyq ál-aýqat qorynyń jáne Qazaqstan Respýblıkasy Bilim jáne ǵylym mınıstrliginiń qoldaýymen respýblıkalyq «Daryn» ǵylymı-tájirıbelik ortalyǵymen birge uıymdastyrǵan edi.


«Qazaqstan - 2050» jalpyulttyq qozǵalysy osy jyldyń shildesinen bastap qazan aıyna deıin elimizdiń barlyq aımaǵyndaǵy mektepterden «Jasyl energetıka», «ІT», «Modeldeý jáne robototehnıka», «Turmysqa paıdaly ónertabystar» taqyryptary boıynsha oqýshylardyń jobalaryn qabyldady. Atalǵan olımpıadanyń negizgi maqsaty - oqýshylardyń jobalaryn ári qaraı damytý jáne óndiriske engizý. Olımpıadaǵa 200-den asa joba usynylsa, sonyń 20-sy irikteýden ótip, qazylar alqasynyń aldynda qorǵaldy. Sonyń ishinde 10 úzdik jobaǵa arnaıy mentorlar bekitilip, oqýshylardyń jobasyn ári qaraı damytýǵa jol ashyldy.

Qýanysh Amanǵalıdyń «Potentsıaldy qan tapsyrýshylardy izdeýdiń ınnovatsııalyq júıesi» dep atalatyn jobasy úzdik 10 jobanyń qataryna endi. Nátıjesinde Qýanyshtyń mentory bolyp MOS Business Incubator kásipornynyń bas dırektory Pavel Koktyshev bekitildi. Endi olar jobany ári qaraı damytý jáne ony halyq tutynatyn taýarǵa aınaldyrý maqsatynda jumys jasaıtyn bolady.



Qýanysh Amanǵalıdyń jobasy eki komponentten turady: ZhureqForm jáne ZhureqLink. Alǵashqysynda arnaıy posterlar jasalyp, onlaın formasynda saýalnama toltyrý jáne derekter bazasyn jasaqtaý qarastyrylǵan. Al ekinshi bólikte qan tapsyrýshylardy izdeýge arnalǵan derbes áleýmettik jeli jumys jasaıdy. Atalmysh derekter bazasy qajet kezinde donordy tez tabýǵa úlken septigin tıgizbek. 

Aıta keteıik,  joba jetekshisi - ınformatıka pániniń muǵalimi Aısulý Súleımenova